Atualità
Stazion sun Jëuf de Sela azeteda dala cumiscion per la cuntreda
USP – La segonda Cumiscion provinziela per la cuntreda à n merdi, 30 nuvëmber, tratà na stazion nueva sun Jëuf de Sela per n lift dai stuei. L proiet ie unì azetà cun vel cundizions. L bënsté à nce giapà n mënder ntervënt pra la utia Capanna Alpina a Armentarola.
L lift dai stuei sun Jëuf de Sela, che fej pert dla Sella Ronda dëssa unì fat da nuef y ngrandì cun stuei da sies persones. L proiet fova bele unì azetà dala Cumiscion provinziela per la cuntreda. N merdi 30 de nuvëmber iel unì tratà l proiet dla stazion a val nueva. “Chësc proiet ie unì azetà te si terza verscion, do che l ie unì laurà ora da nuef a una cun l’autorità provinziela per la cuntreda y cun l Chemun de Sëlva per l fé passené miec tla cuntreda” spiega l presidënt dla cumiscion Ariano Oggiano.
La stazion nueva unirà frabicheda sun na spersa de 900 metri cuadrac, n pert sota tiera y n pert sëura tiera. I patrons muessa garantì che l vënie zarà ju la vedla stazion, che l vënie menà demez l material y che l vënie fat crëscer ite sromes ala cuntreda, sënies di lëures. Per la segurëza de chëi che va cun i schi, dëssel unì fat na sief permez al tët dla stazion. Per frabiché l lift nuef se à la Segonda Cumiscion provinziela per la cuntreda damandà na cauzion de 80.000 euro.
La Cumiscion per la cuntreda à nce azetà l proiet che reverda la Capanna Alpina a Armentarola, sëura San Ciascian. L fova unì damandà de pudëi fé tlosec y na luegia per abiné adum l refudam pra chësta utia, ulache l vën muet per jites tl Parch naturel Fanes Sennes Braies.
as
