Atualità
Scolina ladina valuteda dala revista naziunela Gulliver
USP – La revista Gulliver, una dla zaites per l nfanzia plu cuotedes a livel naziunel à te si ultima edizion dedicà na gran lerch al federalism dla scoles fajan referimënt ala scolina ladina.
L cunvëni sun la maniera de nseniamënt cun de plu rujenedes CLIL, stat ala fin de utober a Urtijëi, à dat ucajion al cunesciù espert de scola y sindacalist Luigi Martano de prejenté la scolina tla Provinzia de Bulsan y n particuler la scolina ladina sciche ejëmpl de federalims scolastich. Vijitan de persona la scolina Salieta a Urtijëi se à l dirijënt scolastich fat gran marueia dla cualità de lëur, furmazion dla culaburadësses y dla strutures dla scolina ladina. Martano à abù gran plajëi a udëi la culaburazion strënta danter chemun y la istituzions.
La cunsciderazions da dedora fej dassënn plajëi al’ispetëura Edith Ploner: “Tl articul possen liejer ora na gran valorisazion ala scolina provinziela y n particuler a chëla ladina per si prupostes de trilinguism”. La mpurtanza che ie unida dedicheda ala scolina tres la revista naziunela ie nce mutivazion per dutes chëles che lëura tla scolina. “Chësc articul juda a vester plu cuscienc y cuntënc dla cundizions y strutures, ma tl medemo mumënt iel nce mutivazion per miuré nosc servisc” à dit Ploner.
as
