Atualità
Manco delibres tl 2010, manco papieresc
USP – La Jonta provinziela à tl 2010 dat pro 2.234 delibres, che ie scialdi demanco permez a dan n valgun ani y nscì iel nce mesunpurté inant la custions cun manco papieresc. Tla ccunferënza stampa do la senteda dla Jonta dl 30 de dezëmber (ncuei) à l presidënt Durnwalder sorissà che chësc ie stat mesun tres na bona culaburazion danter i assessëures y la sensibltà per i bujëns dla populazion.
Do l’ultima senteda dl ann à l presidënt Durnwalder prejentà la zifres dla dezijions dla Jonta provinziela ntan l ann 2010. L ie unì dant pro 2234 delibres, feter mile manco dl ann passà y n zaron manco di ani passei canche mo dan 10 ani univel dat pro 12.000 delibres. “Chësc ne uel nia di che l ie unì laurà demanco, à dit Durnwalder, ma che truepa dezijions ie unides sëurandates ai singuli assessëures y si repartizions, garantian nscila n sparani de lëur y custimënt publich”.
N cont de dé pro dla delibres iel unì laudà la bona culaburazion danter assessëures y i partner de coalizion. “97,4% dla delibres ie unides dates pro zënza stima de contra, à dit l presidënt, chësc ie n sëni che l vën fat truepa descuscion, ma che n abina na soluzion per ti unì ancontra ala populazion”.
L cuntrol dl chemuns à tl ann 2010 dat pro 895 delibres dl’aministrazions de raion (94,5%) y ne à nia azetà 57 (5,5%) di documënc prejentei ala Jonta provinziela.
as
