Atualità
Cuncors de sustëni per 800 stieres tl ciamp dl frabiché
USP – Do che la Provinzia de Bulsan se ova metù adum cun chëla de Trënt per damandé n sustëni europeich per la stieres jites perdudes tesć la crisa finanziera, à l presidënt Durnwalder (ncuei) do la senteda dl 31 de jené cunedì che l’Union Europea à azetà l dumanda y che l unirà scrit ora n cuncors per patrons de lëur.
L sustëni europeich reverda l ciamp dl frabiché ulache danter Bulsan y Trentino ie jit perdudes passa 300 stieres. Aldò dl program europeich uniral śën scrì ora n cuncors per sustenì 800 stieres. Patrons de lëur che ti dà da lëur ala categuries plu dëibles giapa n sustëni danter 2.000 y 5.000 euro per stiera. Chësc program jirà inant per dut l ann. A chësta maniera vëniel judà do acioche persones sëura 50 ani, persones cun na invalidità sëura 46%, persones che ie bele passa 24 mënsc zënza lëur, persones che vën ora de perjon, y Siti o Roma ruve pra na stiera. “N sustëni a chësta maniera ie scialdi miec che dé scioldi a chëi che à perdù l lëur” à detlarà l presidënt dla provinzia.as
