Atualità
Mussner: la forma de censimënt ie n’arjonta dezisiva per i ladins
USP - La forma dl censimënt 2011 che la Jonta provinziela de Bulsan à dat pro chëst ena ie dezisiva per i dërc dla populazion ladina tl daunì. L assessëur ladin Mussner valutea la dezijion dla Jonta sciche arjonta mpurtanta de nosta mendranza etnica. La detlarazion de grupa de rujeneda a fin de statistica ie la fundamënta per seguré i dërc di ladins ti ani che vën.
Pra l censimënt ai 9 de utober 2011 unirà la detlarazion de grupa de rujeneda fata te na maniera nueva. La detlarazion persunela che vën damandeda per giapé na stiera publica ne muessa nia plu fé uni un. Me chiche l’adrova possa se detlaré diretamënter pra la suneria a Bulsan.
La cumpëida de stieres publiches per uni grupa de rujeneda y de cunseguënza i dërc per grupa de rujeneda se stiza sun la detlarazion anonima a fin de statistica. Chëst ena (31 jené) à la Jonta provinziela delibrà che chësta detlarazion de rujeneda a fin de statistica puderà me fé i zitadins taliani che à n l di de referimënt per l cënsimënt la residënza tla provinzia. L’alternativa fossa stata de ti dé chësc dërt a duc i zitadins d’Europa o nchinamei a duc chëi che à la residënza tla provinzia. “La dezijion che ie unida tëuta ie tlermënter a bën di ladins. Sce nce zitadins da oradecà puëssa fé la detlarazion, fossel realisticamënter da fé cont che i se detlarëssa taliani o tudësc. Y la grupa de rujeneda ladina perdëssa si grandëza n relazion ai autri.” nscì la vijion dl assessëur Mussner.
Cun la dezijion de chi che puderà fé la detlarazion de grupa de rujeneda à i reprejentanc tudësc y taliani tla Jonta provinziela tlermënter fat a manco de si cunvenienza per sustenì i ladins. “Sce nosta populazion sustën cun la detlarazion anonima la grupa de rujeneda ladina, ons la gran ucajion de no pierder de perzentuela y anjenië la basa per seguré nosc dërc de mendranza” spiega Florian Mussner. Tenian me cont de 7.500 tudësc y austriacs che vif tla Provinzia de Bulsan iel da se aspité che la grupa de rujeneda ladina pierd de perzentuela.
Pra l’ultimo censimënt dl 2001 se ova 4,37% detlarà ladins. “L ie l mumënt de pensé al daunì y co che nëus ladins pudon mantenì nosta posizion. Sce l vën for mo jënt da oradecà, ne sarà i ladins nia boni de mantenì si perzentuela. La detlarazion anononima, sce la vën nuzeda da nosta populazion, possa deventé na garanzia de dërc y stieres per i ladins” nscì Mussner.
as
