Atualità
Pruvedimënc de ntegrazion tl lëur per 2000 persones
USP – Cun de plu pruvedimënc uel la Jonta provinziela sustenì l integrazion de persones cun handicap tl mond l lëur. L sustëni dëssa dantaprima jì a bën de 900 persones cun handicap che ne abina nia da lëur.
Tla provinzia de Bulsan iel feter 8.000 persones zënza lëur. I assessëures provinziei ie te si senteda (da ncuei) dl 14 de fauré stai a una de sustenì deplù la persones cun handicap acioche les giape na stiera cun segurazion y cuntribuc per la pension. Chësc per ti dé plu denità y che i ne muessa nia plu viver di aiuc soziei. Te chësc mumënt iel bele 677 persones cun handicap che à na stiera publica. “L macia mo for 705 stieres tla Provinzia, chemuns, cumuniteies raioneles o uniteies saniteres” à dit Durnwalder. Tl’economia privata iel bele 1.112 persones cun handicap che à giapà na stiera, ma nce tlo iel mo debujën de 1.098 stieres per ruvé ala cumpëida ududa dant per lege. “La mira dla Jonta ie de ntegré mo feter 2.000 persones cun handicap tl mond dl lëur. Leprò iel nce nscì che uni un che giapa da lëur uel di un de manco da oradecà” à dit l presidënt dla Provinzia.
Aldò dla Jonta provinziela dëssa unì miureda la rë de cuntac danter scoles y patrons de lëur. Per la persones cun handicap che à giapà na stiera dëssel pona unì pità n servisc de cumpaniamënt che lëura ora programs cun l patron de lëur y che debe aiut. “Sce na persona cun handicap ie me bona de purté manco prestazion, uel la provinzia sëurantò la defrënzia” à dit Durnwalder, a na maniera che i patrons de lëur ne ebe nia da pierder economicamënter. Te chësc cuntest iel nce unì lecurdà che cunsorc soziei muessa per lege avëi 30% dla stieres per persones cun handicap. Nce chëstes dëssa unì sustenides de plu.
as
