Atualità
Jonta da pro i programs per stredes y frabiches
USP – Ntan chësc ann dëssel unì frabicà per feter 170 milion de euro. I programs prejentei dal assessëur Florian Mussner ala Jonta provinziela vëija dant nvestizions per scoles, spediei ma nce truepa stredes y zircunvalazions.
62 milion (plu trëi per mubilia) à la Jonta provinziela dat pro per fé su frabiches ntan l 2011. Gran pert de chësta soma vën adurveda per strutures de nseniamënt y sanità. “44 milion de euro ie udui dant per frabiches che ie bele unì scumencedes ti ani passei, che vën purtedes inant o che vën finedes chëst ann” à spiegà l presidënt Durnwalder riesc do la senteda dla Jonta. Per frabiches che unirà scumencedes chëst ann iel udù dant 21 milion de euro.
Nce i 101 milion dai pro per la stredes iel gran pert prugramei per lëures bele scumencei. “86 milion unirà adurvei per purté inant o finé stredes” à dit Durnwalder. I majeri capituli da chëst ann reverda tlo dantaprima la stredes de zircunvalazion. Danterauer uniral frabicà inant la zircunvalazion de Maran (17 milion), la zircunvalazion de Persenon (passa 14 milion), l tunel de Ciastel Badia (9,6 milion), la zircunvalazion de Vandoies (8,7 milion), Branzoll-Leifers (8,7 milion) y chëla de Auer (8,7 milion).
“Cunscidran i proiec che ie bele dai pro fossel sëuraprò ai 100 milion dl 2011 mo debujën de 660 milion de euro” à dit l presidënt fajan dal’autra pert referimënt a feter 70 lëures che unirà finei chëst ann y che n auter ann saral pona inò scioldi per proiec nueves.
Sëuraprò ai programs per la frabiches y la stredes, à la Jonta nce dat pro 11 milion de euro per lëures de manutenzion straurdinera sun la stredes ntan l 2011.
as
