Atualità
Jonta da prò n sistem nuef de abunamënt: plu chilometri, miëur priejes
USP – N sistem plu scëmpl y saurì da adurvé che cuer dal’autra pert n pue’ miec i custimënc: chësc se à la Jonta provinziela tëut dant cun l sistem nuef de abunamënt per l trasport publich. Plu che n furnea, manco che costa i viages. I assessëures à (ncuei) ai 28 de fauré dat prò i priejes y la categuries che possa furné debant.
Cun la cherta “Südtirol-Abo” puderan furné cun duc i mesuns de trasport publich tla provinzia, zënza abuné na linia spezifica. La cherta puderà unì ciarieda su, sciche na cherta dl fonin, y pona desćiarià n tant per l viac. “Chëi che fej de plu chilometri cun i mesuns publics giaterà de miëur priejes”, nsci l’idea dl sistem nuef prejentà dal presidënt Durnwalder. L ie prugramà de scumencé cun chësc sistem nuef ai prim de jené 2012.
I prim 1.000 chilometri custerà cun l “Südtirol-Abo” 0,08 euro al chilometer (80 euro). Do avëi arjont na soma de 1.000 chilometri, paieran cun l abunamënt nuef me plu 0,04 euro al chilometer. Chiche viagia truep cun i mesuns publics y arjonj pona i 10.000 chilometri unirà premià mo n iede y paierà da iló inant me plu 0,02 euro al chilometer. Sce na arjunjerà i 20.000 chilometri, possen nchin ala fin dl ann furné debant. Cun l sistem nuef uniran a chësta maniera a spënder al plu 640 euro al ann (i prim 1000 km costa 80 euro, i proscimi 9000 km costa 360 y mo i proscimi 10.000 km, 200 euro). Duc i chilometri de plu ie debant. L abunamënt nstës ne dëssa aldò de Durnwalder custé nia. Ma n duplicat custerà 50 euro, mpede 25. Viages singuli, zënza abunamënt, custerà 0,15 euro al chilometer y cun la cherta de valor 0,12 euro al chilometer.
De miëura cundizions iel unì dat pro per i jëuni y la jënt de tëmp. Nchin a 18 ani puderà duc furné debant. Lerneri y studënc possa cun 150 euro (mpede 100) furné dut l ann. L medemo valerà per seniores danter 65 y 70 ani (nchinamò abo 60+ danter 60 y 70 ani). Zitadins sëura 70 ani puderà nce n auter ann furné defin debant cun i mesuns publics.
La Jonta provinziela à sëuraprò mo udù dant cundizions spezieles per families. La cundizions avisa muessa mo unì studiedes ora, l’idea fossa chëla che uem y fëna possa cumpedé adum i chilometri furnei cun mesuns publics per ruvé tla categuria che furnea a miëur priesc.
Sciche bele ti ultimi ani, uniral n auter ann de auril inò pità la cherta de mubilità te trëi mesures. La cherta da 7 dis custerà 28 euro, chëla da 3 dis 23 euro y da un n di 15 euro. Mëndri nchin a 6 ani possa furné debant, danter 6 y 14 ani vën i priejes lascei do dl mez.
La tarifes per l trasport publich tla provinzia de Bulsan ne fova 15 ani nia unides auzedes. Aldò de na normativa europea y l decret Bersani muessa 35% dl custimënt dl trasport publich unì curì cun la tarifes. “Dala situazion atuela de 16% fejen cont de ruvé a curì l 28% di custimënc” à dit Luis Durnwalder. Cun l vedl sistem vëniel trat ite feter 21 milion de euro al ann, l sistem nuef muesseran, aldò de previjions, purté 14 milion de euro de plu. “Chësc aumënt de feter 70% ie calculà do che l ie unì fat de majeri nvestimënc ti servijes” à sorissa l presidënt dla provinzia fajan referimënt ala linies che ie śën plu de mo n tant permez da dan puec ani, feter uni frazion ie culegheda ala rë de trasport y nchinamei furadoies fej pert dl sistem publich.
as
