Atualità
Lëures provinziei sun la stredes de Gherdëina per l 2011
USP – Doi puenc nueves sun l Jëuf de Sela, la streda sota Plan de Gralba, dlandri a S.Cristina y miuramënc a Runcadic: chisc ie i lëures che l Assessorat provinziel per lëures publics à prugramà per chëst ann sun la stredes de Gherdëina. Sun pruposta dl assessëur Mussner à la Jonta provinziela da permò dat pro l program generel per l ann 2011.
L prim lëur che la repartizion per la nfrastrutures à udù dant riesc do l inviern te Gherdëina ie de jì inant cun l puent sun Jëuf de Sela. Bele d’autonn iel unì scumencià a fé da nuef l puent daujin ala cava, al chilometer 26,9. Tlo iel gran bujën de fé da nuef l puent ajache l vedl ne garantësc nia plu la segurëza per i mesuns plu pesoc. L puent nuef unirà fat sun na lunghëza de 10 metri y 7 metri de larghëza (de ndut).
Davia che l ie truep muvimënt sun la streda dl Jëuf de Sela iel unì prugramà n puent provisor ntan i lëures. De mei fejen cont che la firma Enrico Rella de Urtijëi posse jì inant cun i lëures y i finé nchin de agost. La proietazion dl puent, direzion di lëures y mesurazions tecniches vën fates nstës dal Assessorat ai Lëures publics. L custimënt udù danora ie de ndut de 309.000 euro.
Daujin a chësc cantier iel mo n segondo puent che à giapà gran priorità per unì fat da nuef. Nce chësc puent mesura na lunghëza de 10 metri. Tlo se tratel de n nvestimënt de ndut 270.000 euro.
La streda di jëufs, sota Plan de Gralba, unirà miureda y trata ndrët sun na lunghëza de 1630 metri. Chisc lëures ie dantaldut debujën tla raida da Merch ulache na curiera stënta dassënn a despassé via n auto. L Ufize tecnich per la stredes ie tl lëur de anjenië l proiet de mascima, per chël che l vën te chisc dis fat proves geologiches. L finanziamënt de 3.700.000 euro per chisc lëures ie bele dat pro tl program di lëures y nsci fejen cont che nchin ala fin dl ann possa unì dat pro l proiet esecutif.
Pra la streda de zircunvalazion nueva de S.Cristina uniral mo metù su dlandri de puent y parëies contra la fuera. I lëures ie unic prugramei per n custimënt de 368.000 euro. Per mëter su i dlandri dl puent Monte Pana y Salsong, ulache l unirà nce metù su i parëies, iel udù dant de plu mënsc de lëur.
A Runcadic iel per chëst ann prugramà de valivé la streda tl raion da Digon. Sun na lunghëza de feter 600 metri (km 10,3 nchin 10,9) uniral cumedà la streda y fat doi lueges ulache la curieres possa fermé plu saurì. Per la segurëza de chëi che va a pe uniral nce fat leprò n toch nuef de tretuar. Te chësc cajo iel unì metù a jì na culaburazion danter Provinzia y Chemun da Ciastel. A chësta maniera iel te chisc lëures nce udù dant de mëter su na luminazion che compra l chemun. L servisc provinziel se cruzia mplu de mëter ju roles per l’ega da bever y l chemun juda a finanzië chisc lëures che fej ora de ndut 1.178.000 euro.
as
