Atualità
Di mundiel dl teater ai 27 de merz 2011
USP - N ucajion dl di mundiel dl teater sotrissea l Assessëur Florian Mussner “L teater ie de gran mpurtanza per cie che reverda la furmazion creativa, linguistica y persunela de pitli y granc de duta la rujenedes y cultures.”
Dlongia la mujiga y l’ert ie l teater zënzauter na forma de cultura scialdi prijeda tla valedes ladines. “Tla valedes ladines iel na longia tradizion de teater, feter uni luech a si lia de teater che porta uni ann dant vel’pez ala populazion: l vën dantaldut pità cumedies populeres che à for n gran suzes pra l publich, ma danterite y danter ora vëniel nce nterpretà vel’ pez tlassich.” nsci l Assessëur Florian Mussner. Te Gherdëina vëniel purtà dant pec per ladin y tudësch, tla Val Badia vëniel fat truepa reprejentazions per ladin.
L Assessëur ala Scola y Cultura ladina auza ora che l ann passà iel per l prim iede unì metù a jì dala lia Erehwon l festival nternaziunel “Ater-te –ater”. “Chësc festival à pità n teater inovatif, de bona cualità cun grupes da dlonch caprò y ie scialdi unì prijà dala populazion, perchël uniral chëst ann de lugio inò a se l dé.”Chëst’ ann à la lia Erehwon sëuraprò udù dant n workshop per atëures y un per scritëures ladins. L’idea ie chëla de purté dant al festival n pez scrit per ladin dai partezipanc al workshop. “Chësta scumenciadiva me fej dassënn plajëi ajache la sustën l teater per ladin” nsci l Assessëur Florian Mussner.
Sëuraprò pieta la Facultà de Scienzes de Furmazion dl’Università de Persenon chësc semester n curs de lingaz teatrel che ie dantaldut pensà per maestri y maestres dla scolina y dla scola y che vën menà dala dut.ra Erika Castlunger. Tl curs vëniel mustrà su coche l teater possa unì nuzà a na maniera didatica tla scoles y scolines. “L me fej plajëi che ti ultimi ani se à te nosta valedes muet truep tl ciamp dla furmazion teatrela y ie son dla minonga che l teater ie n mesun adatà per nsenië rujenedes, mparé a comuniché y a lauré te na grupa, perchël speri che truepa persones tole l’ucajion de tò pert a chësta scumenciadives” nsci l Assessëur ala Scola y Cultura ladina Florian Mussner.usp
