Atualità
Mëisa turonda per l aeroport de Bulsan
USP – L svilup dla aeroport a Bulsan ie (ncuei) ai 4 de auril inò stat argumënt dla Jonta provinziela. Do che l’ena passeda fovel unì dat pro l masterplan, iel chëst ena unì dat pro i cumëmbri dla mëisa de descuscion che dëssa abiné n cunsëns.
Na lingia de reprejentanc de istituzions y grupes de nteres defrëntes ie unic nviei dala Jonta provinziela a rujené pea sun l svilup dla aeroport pra na mëisa turonda. A cë de chësta grupa de descuscion dëssel vester l assessëur ala mubilità Thomas Widmann. Nce l assessëur ai lëures publics Florian Mussner dëssa rujené pea cun l cunseliera provinziela Rosa Thaler, reprejentanc de trëi cumuniteies raioneles Überetsch-Unterland, Bulsan y Salten-Scilier cun i ambolc de Bulsan, Branzoll, Pafatten, Leifers, Eppan y Kaltern.
Deberieda cun i aministradëures publics ie nce nviei reprejentanc dl’assoziazions sciche l Südtiroler Wirtschaftsring y la assoziazion de rujeneda talian USEB, l’assoziazion di paures y la Coldiretti, l Dachverband für Natur- und Umweltschutz, la Lia da Mont AVS y la lia “Lebenswertes Unterland” cun reprejentanc di sindacac.
“La se trata de tò tres i vares de svilup y de udëi mo n iede sce la normes dl’autorità de jol ENAC dà lerch da se muever” à dit Durnwalder do la senteda dla Jonta provinziela. La mira ie de mëter a jì l svilup aldò dl’idea dla meditazion a na maniera che l aeroport posse unì menà inant cun efiziënza zënza de gran lëures de costruzion y respetan chël che la populazion se damanda. “Ne penson nia a n gran aeroport a Bulsan, ma a n pitl, che sibe segur y adatà a nosta mesures” à dit Durnwalder.
as
