Atualità
8% de plu sculeies tla scoles autes ladines
USP – Tl proscimo ann de scola saral 27 sculëis de plu tla scoles autes ladines. La cumpëida generela di sculeies dala scolines nchin tla scoles autes sarà de setëmber cun de ndut 3312 sculeies, ënghe de 27 majera. L aumënt de iscrizions vën valutà dai respunsabli dla scola sciche sëni de crëta de vies dl sistem scolastich ladin cun l nseniamënt de plu rujenedes.
Aldò dla iscrizions saral tl ann de scola che vën 444 sculeies tla scoles autes ladines. Permez ala cumpëida atuela ie chësc n aumënt de 7,8%. 103 jëunes y jëuni jirà de setëmber l prim iede a na scola auta. La iscrizions ala prima tlasses se à do la rata mantenì permez ala cumpëides dal ann passà, calan me de cin sculeies (4,6%). Tl Istitut tecnich y tl Lizeo d’ert a Urtijëi uniral fat doi prima tlasses. Te chësta doi scoles iel nce stat de plu che se a scrit ite ala prima tlass permez al ann passà. 47 jëuni à tëut la dezijion de fé l Istitiut tencnich economich (6 deplù) y 35 l lizeo d’ert (3 deplù). Nce tla scoles autes a La Ila uniral d’autonn mantenì la medema cumpëida de prima tlasses. 13 se à scrit ite ala prima tlas dl Lizeum (2 de manco) y 8 (12 de manco) tl Istitut tecnich economich. “L fej plajëi che de setëmber uniral nce nuzà duta la vela dla scoles autes ladines che ie unida prugrameda tl cheder dla reforma dla scola auta” dij l ntendënt Roland Verra y l diretëur de repartizion Alexander Prinoth.
La cumpëides dla scoles de ublianza ne depënd n generel nia dala dezijion dla families, ma plu che auter dala variazion demografica. Tla scoles mesanes à scrit ite 846 sculeies per l proscimo ann de scola. Chësta ie avisa la medema cumpëida sciche l ann passà. Tla 15 scoles elementeres de Gherdëina y dla Val Badia saral d’autonn 1279 sculeies, 27 (2%) de manco permez ala iscrizions dal ann passà.
La cumpëida de duc i livei dla scoles ladins ie aumenteda de 27 sculeies arjunjan nsci 3.312 sculeies. Cun l prim de setëmber 2011 saral mo na scola sëuraprò che fej pert dla Ntendënza ladina, la Scola prufesciunela per l artejanat artistich a Urtijëi.
as
