Atualità
Furestela straufa la motoslites ntëur l Sela
USP – Canche i mplanc portamont sera d’ansciuda, ne iel mo nia gheneda sun i purtoies y sun la montes. Nscila iela inò stata n lunesc de chëst ena (ai 11 de auril): sun Plan de Gralba à culaburadëures dla Furestela fermà su set motoslites che ova fat la Sellaronda. Da pert dla stazion dla Furestela de Persenon vëniel lecurdà che de tel raides cun la motoslites ie pruibides per lege ti raions sota defendura y che l vën fat cuntroi dedichei.
Chisc dis iel trueps che se lamënta pra la stazions dla Furestela n cont dla motoslites. Tl cajo dla stazions de Persenon y Burnech, à i culaburadëures bele ti ani passei usservà che te Gherdëina y tla Val Badia iel motoslites che furnea sun i purtoies śarei nce sce l ie pruibì. “Chisc dala motoslites se devertësc a dann dla natura ajache i revina raions ecologicamënter sensibli y leprò feji mo fuera che desturba” dij i diretëures dla Furestela Georg Mittertrutzner y Silvester Regele.
Da pert di Ispetorac de Furestela cumpetënc per la Val Badia y per Gherdëina vëniel fat al savëi che l unirà fat de plu cuntroi. Da pert dla Furestela vëniel fat referimënt ala lege provinziela 10 dl 1990 che pruibësc de furné cun d’uni sort de motoslites te raions sota defendura. Nce sce l ie bele unì fat cuntroi y nce straufà, ne ie la situazion nia miureda sostanzialmënter. Te vel luesc iela nchinamei piecia ajache chëi dala motoslites mët plu verda.
“Per chësta rejon se damanda la Forestela bele da n pez la ntroduzion de targhes per motoslites. Me a chësta maniera iel puscibl fé cuntroi efizienc” dij Mitterrutzner.
Per i culaburadëures dla Forestela ne iel nia tan scëmpl da abiné chëi dala motoslites, ma ultimamënter nen abini for de plu. Nsci iela stata n lunesc ai 11 de auril sun Plan de Gralba. Verdabòsc de Gherdëina y dla Val Badia à tenì su na grupa de motoslites che ova fat la Sellaronda.
as
