Atualità
Giaurì l prim toch dla zircunvalazion per pité deplù cualità de vita y manco trafich a Persenon
USP - Manco muvimënt de auti y plu cualità de vita ie stat l pensier che à cumpanià NCUEI domesdì (16 auril) la giaurida dl prim toch dla zircunvalazion de Persenon. N lunesc puderà passé i prim auti. L presidënt dla Provinzia Luis Durnwalder y l assessëur ai lëures publics Florian Mussner à deberieda cun l ambolt de Persenon tenì la zeremonia y festejà la revalutazion dla zità.
Sun la streda nueva uniral avisà demez na bela pert dl muvimënt di auti y chësc cumporta manco ntussiamënt dl'aria, manco fuera, plu gheneda y nsci na miëur cualità de vita per l zënter. Pra la giaurida de una dla majera nfrastrutures che la Jonta provinziela ie tl lëur de mëter mpé iel nce unì adalerch i ambolc de Persenon Albert Pürgstaller y de Vahrn Andreas Schatzer. Danter la persunaliteies prejëntes fovel nce la senatëura Maraipia Garavaglia.
L muvimënt di auti puderà n lunesc ai 18 de auril passé tres i doi tuniei nueves y la rundeles a sud y nord.
La streda nueva juda pro a na revalutazion dla zità nce da pont de ududa economich y turistich. „Per Persenon iel n gran var inant - à dit Mussner - per la Provinzia uelel di avëi finà na pert prinzipela di lëures de priorità per miuré la viabltà.“ La streda de Persenon ie n ziedl mpurtant dl cunzet de mubilità tl Südtirol“. L presidënt Durnwalder à sorissà la fazion mpurtanta dla zircunvalazion per raions cun cuatieres y butëighes. „Cun chësta nfrastrutura passerà l muvimënt de transit dlongia la zità via“.
L toch de zircunvalazion che ie unì giaurì scumëncia a sud tl raion ndustriel, al'autëza di mplanc sportives. L prim tunel mesura 1.200 metri, pona iel unì fat n toch daviert de 768 metri ulache n possa raidé ite tl zënter. L tunel a nord ie feter 800 metri lonch y ruva ora a nord dl spedel de Persenon.
Tla proietazion de Matteo Scganol y tla realisazion tres la firmes PAC, Betoneisack y Passeierer Bau, iel unì dat gran pëis ai pruvedimënc contra la fuera y l respet per l ambient.
Cun l segondo toch, musererà la zircunvalazion de ndut feter cin chilometri cun n custimënt generel de feter 110 milion de euro. L toch che ie bele unì giaurì à custà feter 71 milion de euro.
as
Galaria dales fotografies
Giaurì l prim toch dla zircunvalazion per pité deplù cualità de vita y manco trafich a Persenon
Mussner n cont dl nvestimënt dla zircunvalazion de Persenon
- Scarica il file audio 424 kb
