Atualità
Jonta provinziela ne scurta nia tla furmazion
USP – La Provinzia de Bulsan ie una dla pueces che ne à nia scurtà mesuns tl ciamp dla scola. Chësc ie unì ora dala tlausura dla Jonta provinziela ulache l ie unì tratà cuestions aministratives do che ie unides fates la iscrizions per l ann de scola nuef cun la reforma dla scola auta.
L finanziamënt per la scoles dl Südtirol ie unì segurà nce per l daunì zënza che l ne vënie scurtà. Te tëmps che l muessa unì scurtà i finanziamënc, uel la Jonta provinziela tenì sun la furmazion di jëuni, chësc ie unì segurà dal presidënt Durnwalder y dai vizepresidënc Tommasini y Berger do la tlausura. Na cuestion zitia ie daniëura l mantenimënt de scoles te pitli luesc dl raion da mont y scoles autes ulache l ie me puecia iscrizions.
De bon uedl iel unì udù la cumpëides tla scoles autes che ie inò jites suvier y che se spartësc sun la vela dla scoles autes che ie unides pitedes. La Jonta provinziela tën dala sia de nia lascé pro scoles autes che ne à nia iscrizions assé. Vel scoles autes ne puderà nia unì pitedes d’autonn, ajache l ie massa puec che se à scrì ite. “L gymnasium tlassich a Maran cun 8 scric ite, per ejëmpl o la sola auta per turism de Sand in Taufers cun 12 scric ite ne possa nia unì pitedes” à dit Durnwalder. Azetà vëniel me sce tres urganisazion nterna iel la scola bona de mëter adum vel tlasses.
Per la scoles ti pitli luesc da mont à la Jonta provinziela fat ora de pensé sëura sun la regulamentazion che udova dant se śaré la scoles cun manco de 5 sculeies y de valuté cajo per cajo la scoles da 6 a 17 sculeies. “Ulon tò la miëura dezijion per l bën di sculeies, sun la basa de n cunzet pedagogich che nes juda a udëi ora sce l ie miec śaré la scola o no” à dit Durnwalder. Pont zentrel ne ie perchël nia la cumpëida di sculeies, ma de seguré la miëura furmazion che se lascia te na mesura adateda.
as
