Atualità
Bulsan resta sënta per la fabrich dal acel, la Provinzia fej na reduzion dl fit
USP – La firma dal acel Valbruna puderà resté a Bulsan Sud seguran nce sce l ie tëmps de crisa, la stieres. Chësc à i dirijënc dla firma segurà al assessëur Roberto Bizzo che à da pert dla Provinzia arbassà 50% dl fit per la fabrich a Bulsan. L cuntrat danter Valbruna y la Provinzia ie unì sotscrì (ncuei) ai 28 de auril.
Cun sudesfazion à l assessëur per l lëur Bizzo pudù prejenté l’acurdanza danter Valbruna y la Provinzia cun chëla che l vën segurà la sënta a Bulsan: „l ie tler che trajon ite demanco cun l fit, dal’autra pert nes iel unì segurà che l ne unirà nia smendrì la cumpëida de culaburadëures“, nsci Bizzo che à sorissà la mpurtanza de chësta acurdanza per cuntenì la cunseguënzes dla crisa sun la stieres tlo da nëus.
La sotscrizion dl assessëur Bizzo y dl manager de Valbruna Marco Gasparini fina via na cuestion che fova nasciuda dan passa 15 ani. Dl 1995 ova la Provinzia cumprà la puscion sun chëla che l ie la fabrich dal acel a Bulsan Sud. Cun chësta nvestizion uloven schivé che la firma messëssa śaré y chësc ie nce unì arjont. Da ntlëuta paia Valbruna uni mez ann n fit ala Provinzia, che do la crisa dl acel 2009 ie deventà n pëis massa grant per la firma.
Per schivé mo n iede che l unissa śarà la fabrich dal acel, iel unì marciadà da nuef l cuntrat cun Valbruna. „L risich che 490 dependënc y 150 d’autri lauranc fossa te n iede zënza lëur fova massa grant“ dij l assessëur. La Jonta provinziela à bele d’instà tëut la dezijion de smendrì l fit y la tratatives aldò ie śën finedes via. Per la puscion tla streda Volta paia la firma Valbruna da moinla me plu doi percënt mpede cater. La firma se mpënia perchël a no smëndrì stieres.
as
