Atualità
Jonta provinziela cun pruvedimënc y sustëni per l tlima
USP – Cun na strategia per n tëmp plu lonch uel la Jonta provinziela fé devënte l Südtirol na provinzia-tlima. Nchin tl 2050 uelen arbassé l emiscion de CO2 da 5 a 1,5 tones per persona al ann y curì nstës l bujën de energia.
Te si senteda dl 9 de mei (NCUEI) se à la Jonta provinziela dat ju plu giut cun la strategia prejenteda dal assessëur Michl Laimer. La mira ie che l Südtirol devënte nchin tl 2050 na provinzia-tlima sustenian la produzion de energia alternativa y arjunjan plu efiziënza. “L prim pont ie l sparanië energia, che ulon sustenì cun pruvedimënc y sustënies dedichei” à dit l presidënt Durnwalder. N majer pëis ti dà la Jonta provinziela ala sensibilisazion dla populazion de judé pea a sparanië energia y nuzé formes alternatives.
Cun la fundazion de na agenzia dl’energia uel la Provinzia dé cunsulënza ai chemuns y ai zitadins sun cuestions che reverda l sparanië energia.
Un di gran obietives ie nce la reduzion de emiscion de anidrida de carbonium. Tl Südtirol vëniel lascià ora 5 tones de CO2 per persona al ann. „Permez al raion europeich cun 9 tones y l USA cun feter 20 tones, sons tl Südtirol bele danora. Ma nchin tl 2050 ulons ruvé ju a 1,5 tones de CO2 y curì passa 90% dl bujën de energia cun funtanes da adurvé plu suvënz” à dit Durnwalder.
La strategia per stravardé l tlima unirà mo prejenteda plu avisa te na cunferënza stampa.
Lianza per l tlima: Jonta a una sce i chemuns la uel
Sëuraprò ala strategia per l tlima à la Jonta provinziela nce tratà si posizion n cont dla Lianza per l tlima. Dan puec ani fova 95 de 116 chemuns cumëmbri dla Lianza per l tlima, śën iel me plu restei 35 chemuns. “La Provinzia sustën la Lianza per l tlima, ma la ne sëurantulerà nia l’ublianzes di chemuns” à l presidënt Durnwalder dit cun paroles tleres. Sce i chemuns ie dla minonga che chësta Lianza ne ie nia plu de atualità, pona ne se meterà la Provinzia nia de contra – à spiegà l presidënt dla Provinzia.
as
