Atualità
Reforma agricula: Durnwalder prejënta a Bruxelles la dumandes dla regions
USP – La politica europea per l’agricultura dëssa de plu tenì cont di raions da mont, valivé ora svantajes naturei y tò pruvedimënc per alimenteres. Chësc se à Luis Durnwalder sciche portausc dl cumité dla regions damandà (ncuei domesdì) ai 11 de mei a Bruxelles. La pruposta prejenteda tl Parlamënt Europeich ie unida azeteda y unirà data inant ala Cumiscion Europea.
L Cunsëi dla regions ova nciarià l presidënt dla Provinzia de Bulsan de lauré ora na tëuta de posizion sun la prupostes dla cumiscion n cont dla reforma dla politica agricula. Ncuei, ai 11 de mei à Durnwalder prejentà si pruposta tl plenum dl Cunsëi dla Regions che l à azeteda y mandeda inant ala Cumiscion Europea sciche posizion ufiziela. “Bele danora ons crì l cuntat cun la Cumiscion Europea, perchël ie truepa de nosta dumandes bele tla pruposta dla Cumiscion” dij l Presidënt dla Provinzia.
I argumënc zentrei iel l paiamënt ai paures per seguré si davani. “Chisc paiamënc ne ie nia na scincunda ma i dëssa unì dai ajache i fej nce truep per la cumenanza” dij Durnwalder. Per raions cun dificulteies spezifiches sciche i raions da mont vëniel damandà majeri cuntribuc per i luesc da paur. “Damandon pruvedimënc per mantenì la produzion dl lat te chisc raions nce canche fina la regulamentazion dla cuotes. Chësc ie debujën sce ulon mantenì prei y montes” nsci Durnwalder. Tl pachetl de pruvedimënc per i raions da mont iel nce aiuc per la montes, i programs de biodiversità y la recunescënza de prudoc de cualità che vën fai tla montes.
La regions europees se damanda nce n majer sustëni per la prestazions per l ambient che i paures fej. L lëur da paur biologich y ntegrà dëssa giapé de majeri aiuc. De chësc viers dëssa nce paures jëuni, la furmazion y cunsulënza giapé plu sustëni. Durnwalder se à nce tëut a cuer l smendrì de burocrazia per la pitla firmes se damandan regulamentazions adatedes.
Acioche i produzënc giape plu pëis tl marcià di alimenteres se damanda l Cunsëi dla regions de sustenì canche produzënc uel se mëter adum. Chësc, nsci Durnwalder reverda dantaprima per la produzion dl lat ti raions svantagei. “L se mëter adum y l marketing deberieda dëssa curì l busc che resta canche toma demez la cuotes” nsci Durnwalder che a Bruxelles prejenterà si posizion purteda dant al Cunsëi dla regions, nce ai media nternaziunei.
as
