Atualità
Program strategich dla Jonta provinziela per la families
USP - La Jonta provinziela uel sustenì de plu la families. L aiuc che ie bele dëssa unì miurei, leprò dëssel unì pruvedimënc nueves y i aiuc muessa pudëi unì damandei te na maniera plu scëmpla y plu a slune. Chësc à i assessëures provinziei fat ora (ncuei) ai 16 de mei n cont dla strategia per na miëur politica dla familia.
La pruposta dl assessëur Richard Theiner per la politica dla familia tën cont de doi prinzipies. La situazion dla familia y di mëndri ne depënd nia me dala Provinzia, ma nce dai Chemuns, dal’economia, dala lies y dala Istituzions de furmazion. La politica dla familia reverda duc i ciamps dla politica, dala sanità y soziel ala furmazion, cultura, politica di cuatieres, dla stieres, dl’urbanistica y dla finanzes.
Cun la mpustazion nueva dla politica dla families se an dantaprima tëut dant miuramënc. “Fé de plu per la families, miuré cie che fajon bele y cialé che i aiuc ruve a destinazion plu saurì y plu debota” à spiegà l presidënt Luis Durnwalder prejentan trëi pertes: la familia plu sterscia, familia y mestier, aiuc per la familia.
N cont dla familia plu sterscia uel la Jonta provinziela sustenì de plu la prupostes de furmazion y cumpaniamënt, y i zëntri genitores-mëndri. N cont de familia y mestier vala de na miëur coordinazion per la families ulache tramedoi genitores lëura. Aldò dl assessëur Theiner dëssel unì miurà la pusciblteies per lascé cialé di mëndri. “N se à tëut dant de pité lueges per 15% di mëndri nchin a trëi ani, chësc arjunjons bonamënter plu abenëura che ne an fat cont ajache son ruei a n bon pont tla tratatives cun i chemuns” dij Theiner. Cun i chemuns vala nce de ruvé a una per de plu plusciblteies de cialé sun mëndri, dai servijes per i plu pitli, al’umans dl di o la scolines per i plu pitli. “Mo nchin ala fin dl ann uelen mëter su n fond per i servijes che cëla di mëndri, che vën finanzià dai chemuns y dala Provinzia” dij Theiner.
I aiuc finanziei per la families dëssa unì coordinei mo miec. “Ulon cialé do sce i cuntribuc dala Provinzia y dala Region ne possa nia unì metui te un poz” à dit l presidënt dla Provinzia. Da pert dla Provinzia vëniel dat 16 milion de euro y dala Region mo n iede 21 milion. La Jonta provinziela studieia do pusciblteies per unì ancontra ala families cun la chëutes. Families dëssa nce pudëi prufité de na cherta per strutures y mplanc. “Chësta cherta pudëssa unì ntegreda tla cherta di servijes che ie bele unida data ora” à dit Durnwalder.
La Jonta provinziela à dat pro na pruposta de lege che tol ie duc i pruvedimënc, l sustëni y la normes a bën dla families. “L unirà pità scemplificazions pra la dumandes y d’autri vares burocratics” dij Theiner. La lege dëssa mo unì data pro ntan l 2011 a na maniera che la posse ji n drova dl 2012.
as
