Atualità
Pruposta de lege dla Jonta provinziela per l’Euregio
USP – Acioche la Grupa europea de culaburazion teritoriela GECT/EVTZ danter la Provinzies de Trënt, Bulsan y Tirol, da permò dates pro a Roma, posse efetivamënter lauré, iel debujën de n regulamënt a livel provinziel. L articul dla pruposta de lege aldò ie (ncuei) ai 16 de mei unì dat pro dala Jonta provinziela y unirà proscimamënter tratà te Cunsëi provinziel.
N var al iede vëniel metù a post duc i vares giuridiches acioche l’Euregio possa deventé na istituzion de culaburazion danter la trëi provinzies. La Jonta provinziela à juntà tl dessëni de lege dla purtina unica per ativiteies de produzion, nce n articul acioche la Provinzia possa numiné si reprejentanc ti urganics dla Grupa europea de culaburazion teritoriela. “Dajon inant chësc dessëni de lege al Cunsëi provinziel speran che l vënie tosc dat pro” à dit l presidënt Durnwalder do la senteda dla Jonta.
Ai 14 de juni iel a Trënt udù dant na senteda dla trëi Jontes provinzieles, de Trënt, Bulsan y Tirol. Nce sce nchin ntlëuta ne saral nia mesun de pro la lege provinziela, uniral te chësta senteda udù dant l’atività de culaburazion cun i prim proiec. Dl cunsëi dla grupa GECT/EVTZ fajerà pert l presidënt dla Provinzia y dl Cunsëi provinziel deberieda cun n segondo reprejentant per uni istituzion. “Dan numiné chësc segondo reprejentant per Jonta y Cunsëi, ulons aspité chiche unirà lità presidënt dl Cunsëi provinziel, ajache tl cunsëi nuef adurvons n balanz danter ëi y ëiles y nce danter la grupes de rujeneda” à dit Durnwalder.
as
