Atualità
La zircunvalazion de S.Cristina ie unida frabicheda tl nteres dla cumenanza
USP – La streda de zircunvalazion de S.Cristina ie unida frabicheda per l bën dla cumenanza arjunjan manco fuera y fum danter la cëses, plu cualità de vita per la populazion y na revalutazion dl zënter. Realisé tan de gran nfrastrutures cumporta nce che vel singul à n svantaje. “Tl cajo dl luech “L’Ampezan” ons cialà do pusciblteies de unì ancontra y on danterauter nce proietà nvestimënc contra la fuera” nsci tol l’assessëur provinziel Florian Mussner posizion ala cuestion trata su tla zaites dl dann per la cësa che ie daujin ala streda nueva.
Nvestimënc te gran strutures sciche la zircunvalazion de S.Cristina, che mesura 1.680 metri, vën daniëura fai per l bën da na majera cumpëida de zitadins. L ie la soluzion de n problem che la populazion de S.Cristina ova tres si ambolt bele metù dant ti prim ani dl 2000. Su per l zënter passova tan de auti che la fuera y l fum fova deventà n pëis massa pesoch per la populazion.
“Bele tla prima fasa dla proietazion, canche fan mo tl lëur de crì ora la miëura ideies é persunalmënter tëut su cuntat cun i patrons dl luech “L’Ampezan” per cialé co ti unì ancontra. Fan ruvei a una sun alternatives sce la streda fossa passeda avisa ulache ie la cësa. L cuncors de ideies per la zircunvalazion à pona purtà n’autra soluzion, che ne jiva nia plu a tuché la cësa y nsci ne iel nia plu stat debujën de la zaré ju. L ie nchinamei stat mesun abiné na linia dla streda zënza ne messëi nianca ti tò vel toch de grunt a chësta cësa privata” spiega Mussner.
Cun la giaurida dla streda de lugio 2009 iel unì spustà l trafich demez dal zënter ulache vif na gran pert dla populazion. A chësta maniera ie miureda dassën la cualità de vita a S.Cristina. Davia che l ne ie nia plu l toch ërt sciche tla vedla streda, lascia i auti śën nce ora manco fum. Sun feter mesa lunghëza dla zircunvalazion vën la fuera stluta ite dai tuniei. Ti toc davierc daujin ala cëses iel bele tla proietazion unì udù dant parëies contra la fuera. “I lëures per mëter su chisc parëies scumëncia tla proscima enes. L nvestimënt dla Provinzia contra la fuera per la cëses daujin ala streda y per fé passené i puenc tla cuntreda naturela ie chëst ann de 368.000 euro” spiega l assessëur Florian Mussner.
as
