Atualità
10 proiec per produzions TV azetei dala Jonta provinziela
USP – 27 dumandes de sustëni per la produzion de films tl raion dl Südtirol fova unides mandedes ite ala Business Location Südtirol (BLS) y ie unides analisedes dala cumiscion de esperc. La Jonta provinziela à fat ora de finanzië 10 de chisc proiec per films.
“I resultac che l sustëni per la produzion de films à purtà a nosc raion fej gran plajëi y desmostra che l ie stat na bona dezijion” à dit l presidënt Luis Durnwalder tla cunferënza stampa do la senteda dla Jonta (da ncuei) ai 23 de mei. L presidënt dla Provinzia à lecurdà l gran suzes dla fiction cun Terence Hill che ie unì tëut su te Puster y che à purtà de bon resultac n cont de retlam y cuntac turistics.
I 10 proiec, per chëi che la Jonta provinziela à dat pro n finanziamënt reverda de plu sortes de films, dala produzions per mëndri, pec da rì, documenteres y fiction. L unirà adalerch atëures de gran inuem sciche Alessandro Gassmann, Paola Cortellesi, Tobias Moretti y Laura Chiatti. L se trata de trëi produzions talianes, cater tudësces, una dal’Austria y l’autres da tlo. L assessëur Widmann, che à purtà la pruposta de Jonta, sorissea che chësc sustëni à na gran fazion no me sun l inuem ma nce a livel economich. Un di ponc zentrei dl sustëni provinziel ie che 150% dla soma muessa unì spenduda tl raion provinziel. Per i proiec dai pro, iel de ndut udù dant 70 dis te registrazions per chëi che l vën sciazà 1,05 milion de euro che resta tl Südtirol. La Provinzia sustën la produzions cun de ndut 832.000 euro.
I criteries acioche la Provinzia sustën la produzions de filmes tl Südtirol reverda danterauter la trasmiscion di films y la furmazion. “La sozieteies de produzion muessa nce nciarië jënt da tlo a na maniera che l possa unì zidlà su atëures y tecnics prufesciunei da tlo.
La proscima data per mandé ite dumandes de sustëni per la produzion de films, sibe per la preparazion che nce per la produzion, ie l danter l prim de juni y l 15 de setëmber. L unirà dat pëis a produzions da tlo y coproduzions tudësces y talianes.
as
