Atualità
L bilanz dl Safety Park dëssa jì a ega
USP – Sciche udù dant pra la giaurida dl zënter per avisé segures dl 2008, dëssa l Safety Park fé jì a ega l bilanz da chëst ann. Chësc ie (ncuei) ai 23 de mei unì fat ora dala Jonta provinziela.
Trëi ani do la giaurida de mei 2008, à l Safety Park a Pfatten arjont si mira. “Tl 2010 à l zënter mo abù n busc de 160.000 euro, chëst ann dëssa l bilanz per l prim iede jì a ega” à detlarà l presidënt Durnwalder do la senteda dla Jonta.
Sun na spersa de 160.000 metri cuadrac pieta l zënter cursc y proves de avisé segures per d’uni sort de mesuns, dai motores ai majeri camions cun doi toc, tractores y auti sportives. L presidënt dla Provinzia à sorissà la mpurtanza dla strutura per miuré la segurëza sun streda de chëi che avisa, ma nce di autri.
Proscimamënter unirà tëut su cuntac cun l Minister de cumpetënza per mëter a jì cursc de pratica tl Safety Park per chëi che l ti ie unì tëut ponc dla patent ajache i ne se à nia tenì ala regules de streda. N ulëssa nce pité pertes pratiches per l ejam de patent.
as
