Atualità
Ai 31 de mei: sëira de nfurmazion sun la cumpëida dla jënt 2011
USP - Chëst ann d'autonn uniral tenì la cumpëida dla jënt per udëi tan de persones che viv te nosta provinzia y coche les ie partides su danter la grupes de rujeneda. L assessëur provinziel ladin nvieia culaburadëures di media a na sëira de nfurmazion y sensibilisazion n merdi, 31 de mei, dala 6 da sëira sun Jëuf de Frea.
Uni 10 ani vëniel da pert dl Istitut de statistica metù a jì la cumpëida dla jënt. Per defënder la mendranzes etniches vëniel tla provinzia de Bulsan spartì aldò dl pruporz la ressorses dla vita sozio-culturela sciche istruzion, stieres publiches, aiuc per cuatieres y sustëni ala lies cultureles. Pra l'ultima cumpëida se ova 4,37% detlarà ladins, 26,47 % taliani y 69,15% tudësc. Mënda che ie na grupa etnica y plu saurì che la cumpëida dla jënt possa se mudé la proporzion permez al'autra grupes.
Tla sëira de nfurmazion n merdi ai 31 de mei spiegherà l diretëur dl ASTAT Alfred Aberer nuviteies y la forma de relevamënt dla cumpëida dla jënt 2011. L unirà pona prejenterà la campania de nfurmazion y sensbilisazion che ie unida anjenieda l'ucajion. Rejons per se detlaré ladin unirà purtedes dant dal ambolt da la Val, Franz Complojer. Deberida cun l assessëur provinziel Florian Mussner uniral daldò tenì na descuscion sun chësc argumënt.
L Assessorat provinziel ladin nviëia i culaburadëures di media
n merdi, ai 31 de mei 2011
dala 18.00 tl Chalet Gerard,
sun Jëuf de Frea, sëura Plan de Gralba.
Per chësta sëira de nfurmazion uniral adalerch i ambolc dla Val Badia y de Gherdëina, respunsabli dla scoles ladines, di servijes de furmazion y dla Cultura ladina, cun nce persunaliteies dla valedes ladines che fej da testimonial ala campania de sensibilisazion.
as
