Atualità
La Jonta provinziela chier albierch per muciadives
USP – Davia che sun la costes dla Talia vëniel daniëura adalerch muciadives nueves, muessen nce fé cont che l ne n unirà do tla provinzia de Bulsan. La Jonta provinziela à (ncuei) ai 30 de mei tratà la pusciblteies nueves de ti dé albierch, pensan per prim a casermes uetes.
Nchiamò à la Provinzia de Bulsan njenià na luegia per 80 persones tla caserma Gorio a Bulsan y tla pension Arnika a Maran. “Davia che l vën for inò adalerch muciadives, ne se lascel nia prugramé tanc che l nen sarà. Ma pudon fé cont che adurvon mo lueges” à dit l presidënt Durnwalder do la senteda dla Jonta. La prutezion zevila a Bulsan à fat la pruposta de tò n afit vel pension o cësa, la Jonta provinziela ie plu per se nuzé de casermes uetes. “Nchin nia gran da giut fovel mo jënt te de plu casermes, tlo muessel vester mesun de les anjenië ca a na maniera scëmpla, zënza de gran custimënc” à dit l presidënt, nunzian Schlanders y Gossensaß. L assessëur ai lëures publics Florian Mussner ie unì nciarià de cialé do ciuna casermes che n pudëssa adurvé y de calculé i custimënc. Sce la ne ëssa nia da jì cun la casermes, uel la Jonta provinziela tò l’alternativa di container y pona permò chëla de tò n afit cëses a Bulsan y Eppan.
as
