Atualità
Program dla scolines per 16.430 mëndri scric ite
USP – La cumpëida dla pitla mutans y di pitli mutons scric ite ala scolina dla trëi grupes de rujeneda ie cun 16.430 mëndri majera che la populazion de na valeda ladina. La Jonta provinziela à (ncuei) ai 30 de mei tëut la dezijion ulà che l muessa unì sarà vel sezion y ulache l ie debujën de nen giaurì mo leprò. Deguna mudazions ne iel debujën tla scolines ladines.
D’autonn jirà 16.430 mëndri ala scolina, de chisc 12.004 tla scolines tudësces, 3.682 tla talianes y 744 tla ladines. Tlo saral feter 1900 maestres y culaburadësses che cëla de ëi. “On tëut la dezijion de nia scurté stieres tla scolines, ma de les mantenì sciche l ann passà” à dit l presidënt Durnwalder do la senteda dla Jonta. A chësta maniera laurerà 1305 tla scolines tudësces, 498 tla talianes y 87 tla scolines ladines.
A Bulsan y Maran uniral fat de ndut trëi scolines nueves. Leprò uniral mo fat sezions nueves de de plu luesc. Ajache l ie massa puec scric ite iel stat debujën de saré sezions a Barbian, Stegen, Prissian, Kiens, Ridnaun, Morter y Schluderns, a Eggen y Schlanders. Ulache l ie me danter set y diesc mëndri scric ite, uniral laurà cun manco personal. Nsci iela a Winnebach, Rein, Unser Frau in Schnals, Kematen/Pfitsch, Vetzan y Sulden.
as
