Atualità
Jonta provinziela damanda l custimënt per fé la stazion da ferata a Bulsan
USP – Fajan da nuef la stazion dla ferata de Bulsan unissel ora mo truepa puscion per fé d’autra strutures. Per purté inant chësta idea à la Jonta provinziela (NCUEI) ai 6 de juni sëurandat la ncëria per lauré ora n proiet de mascima sun la stazion nstëssa che ie debujën per na stima dl custimënt. I assessëures provinziei ulëssa smëndrì l cunsëi de gestion y à ntant numinà si doi reprejentanc.
Ala fin de fauré ova l architet Boris Podrecca venciù l cuncors de ideies per la revalutazion dl raion dla stazion dla ferata a Bulsan. L presidënt la Provinzia Durnwalder à do la senteda dla Jonta lecurdà che la sozietà Ferrovie italiane uel che ti vënie fata la stazion nueva, dan zeder raions che ne unissa nia plu adurvei per la ferata. “L ie debujën de lauré ora l proiet che reverda 4 o 5 hectar che n adrova per la stazion y l muvimënt dla ferates” à dit Durnwalder. Permò canche n sarà ruvei a una danter Ferata, Provinzia y Chemun puderan lauré sun l’autra pert de feter 25 hectar ulache n ulëssa frabiché cuatieres, strutures publiches y dé lerch a servijes y ativiteies economiches.
Per nvië via la pert de nteres dla Ferata iel unì nciarià l architet Podrecca de lauré ora n studi de fatibltà, “cun nce na prima valutazion dl custimënt” à juntà Durnwalder. Chësc studi dëssa vester la basa per purté inant la tratatives cun la holding dla ferata taliana che se damanda na stazion nueva cun strutures aministratives per zeder la pertes dl raion che ne unirà nia plu adurvedes.
Davia che ie tumeda la legislatura dl cunsëi de gestion Provinzia- Chemun, à la Jonta provinziela fat la pruposta de smendrì i cumëmbri da 6 a 4. L diretëur generel dla Provinzia Hermann Berger y l aucat Gerhard Brandstätter ie unic numinei reprejentanc nueves dla Provinzia. Śën muessa l Chemun de Bulsan tò na dezijion.
as
