Atualità
Ejams per 332 sculeies tla scoles ladines
USP – N vënderdi ai 17 de juni scumëncia nce tla scoles ladines i ejams per finé via la scola. N iede uniral fat i ejams scric de 5 dis tla scola mesana y pona n mierculdi ai 22 de juni scumëncia cater dis de ejams scric tla scoles autes. Permez a d’autra scoles vëniel tla scoles paritetiches ladines fat na prova scrita de plu.
La majera cumpëida de candidac per i ejams iel tla scoles mesanes cun 272 sculeies. De plu ne iel a Urtijëi ulache 84 ie tl lëur de finé via si otavo ann de scola. N cont de cumpëida vën do la scola mesana de Al Plan cun 73 candidac, Sëlva cun 64 y Badia cun 51 candidac.
I ejams scric tla scola mesana scumëncia n vënderdi ai 17 de juni cun l tema per ladin y la sada chël per talian. L’ena do messerà i sculeies fé la prova naziunela INVALSI che vën tëuta ca per l’evaluazion dla scoles, l tema per tudësch y pona ai 22 de juni mo l ejam de conc, sciche ultima prova scrita.
Tla scoles autes a Urtijëi y a La Ila iel chëst ann de ndut 60 candidac per l ejam de matura, plu avisa 21 tl istitut tecnich a Urtijëi y 24 tl istitut y lizeo a La Ila. Tla scola d’Ert de Urtijëi iel 15 sculeies scric ite al ejam. Te duta la scoles autes ladines possa i candidac ai 22 de juni crì ora sce i uel fé n tema per tudësch o talian. L di do, ai 23 iel te uni scola n auter ejam: economia aziendela tl ITC, rujeneda fulestiera tl Lizeum linguistich y tla sezion turistica dl ITC, dessëni tla Scola d’Ert. La segonda ena de ejams scumëncia cun la terza prova te chëla rujeneda che ne ie nia unida adurveda l prim di. I ejams de matura scric finerà pona via ai 28 de juni cun la cuarta prova pluridisciplinera.
as
