Atualità
Còdesc etich dà majera trasparënza al IPES
USP – Dal prim de lugio jirà n drova l còdesc etich dl IPES che ie unì prejentà (NCUEI) ai 16 de juni. Per l assessëur provinziel Tommasini iel n var mpurtant dla reorganisazion dl istitut per dé plu trasparënza y efiziënza, ma nce per astilé ora dantaprima na contrapusizion de nteresc.
Tenian la gestion de 13.000 cuatieres, y nchin al 2015 nchinamei 15.000 cuatieres, ie l Istitut per cuatieres soziei IPES una dla majera urganisazions dl Südtirol. Ti ultimi mënsc ova la Jonta provinziela dat ndicazions drët avisa sun co che dëssa unì fata la reorganisazion dl’istitut per l frabiché soziel. Un di prim vares ie l còdesc etich che ie unì prejentà te na cunferënza stampa. „L ie n strumënt fundamentel per regulamenté duvieres y respunsabltà de dependënc, diretëures y aministradëures dl IPES; man ce dla firmes y di truep zitadins che à da n fé cun chësc istitut“ à dit Tommasini.
L còdesc etich mët dant la linies de urientamënt, i criteries per l lëur di dependënc a na maniera da garantì efiziënza, efetività y trasparënza dl’ativiteies. Chësc uel di che i culaburadëures muessa fé al savëi a si patron de lëur sce i ie te na situazion de contrapusizion de nteresc y muessa se dainora da dezijions che reverda parënc nchin al segondo grado o cunvivënc. Prticularmënter iel tlo minà de no fé cuntrac cun firmes, de nia pudëi prufité de ncëries y de nia pudëi pië do scincundes da cuntac tres l IPES. Sce chësta ndicazions ne ëssa nia da unì respetedes, uniral fat pruzedimënc disciplineres nchin a ruvé, ti piec caji, a pierder la stiera.
L còdesc etich ne reverda nia me l istitut nstës, ma nce la firmes che à da n fé limpea. Chëst firmes ne puderà te deguna maniera avëi nfluenza tla dezijions dl IPES y muessa fé al savëi sce l vën purvà a trapulé. Sce firmes ne tën nia ite chësta desposizions. unirales stlutes ora dai cuncorsc per la ncëries y l ti unirà desdì i cuntrac.
I proscimi vares dla reorganisazion, nsci l presidënt dl IPES Konrad Pfitscher y si vize Renzo Caramaschi, reverda la realisazion dla cherta di servijes che tol nce ite la nfurmazion y la zertificazion ISO per la repartizion tecnica. L còdesc etich ie l resultat de na grupa de lëur, te chëla che l ie unì trat ite culaburadëures y sindacac. Aldò di presidënc dl IPES se à culaburadëures y firmes rendù cont che l se trata de cumpurtamënc da jì permez cun cuscienza.
as
