Atualità
L vën segurà l puent da Cucheneies sun l stradon a Urtijëi
USP – Sun l stradon de Gherdëina, vëniel a Urtijëi cumedà l puent daujin al luech de Cucheneies. Davia che l muvimënt di auti possa astilé ora sun l vedl stradon, iel mesun finé i lëures te tëmp de n mëns mpede de trëi mënsc.
L puent da Cucheneies, danter Runcadic y Urtijëi ne garantiva nia plu la segurëza per i mesuns pesoc che passa di per di sun l stradon de Gherdëina. L Assessorat provinziel ala stredes lascia ntan l mëns de juni baraté ora la pertes che tën su l puent y ressané dut l puent. Per la jënt che va a pe vëniel fat n tretuar cun na particularità nueva. Danter streda y tretuar uniral fat n parei che spartësc miec la doi pertes y che ie nce de utl per no sprizé su chëi che va a pe canche la streda ie dassënn mola.
“Normalmënter messëssen a de teles lascé passé i auti sun mesa larghëza dl puent y mëter a jì i lëures aldò. Tl cajo de Urtijëi ons cun i chemuns abinà na soluzion de avisé ora i auti y nsci pudons fé i lëures te n mëns mpede te trëi mënsc” spiega l assessëur Florian Mussner. Per mëter a post l puent de Cucheneies, fej l Assessorat provinziel n nvestimënt de 118.000 euro.
as
