Atualità
Roma azeteda trëi normes de atuazion, una reverda la frazions ladines de Ciastel
USP – L Cunsëi di Ministri a Roma à (ncuei) ai 7 de lugio azetà trëi normes de atuazion nueves. Ala senteda tl Palaz Chigi à nce tëut pert l presidënt dla Provinzia Luis Durnwalder. La normes nueves reverda i cuntroi dla Chëurt di Conc, l terzo cunselier de Stat dla provinzia de Bulsan y la cherta de identité nce per ladin ai zitadins dla frazions ladines de Ciastel.
Dan al Cunsëi di Ministri a Roma à l presidënt dla provinzia Durnwalder purtà dant la posizion dla Jonta provinziela n cont dla trëi normes, „che ie unides data pro zënza problems te n tlima sarëinn y cun spirt de culaburazion.
La norma nueva de majera mpurtanza reverda la Chëurt di Conc, che ne messerà nia plu cialé do pratiches aministratives dla Provinzia autonoma, dantaprima i regulamënc che cumpanieia la leges scrites dant dala Union Europea. La norma nueva vëija nce dant che la Chëurt di Conc lasce ala Provinzia l duvier de cialé do i conc publics y l respet dl pat de stabilità sciche l fova bele unì fat ora tl’Acurdanza de Milan. Chësc reverda i chemuns, l’Azienda sanitera, l’Università de Bulsan, la Camera de cumerz, L’Ipes y sozieteies inhouse. La Provinzia fajerà pona al savëi ala Chëurt di Conc i resultac di cuntroi de chësta istituzions. Aldò dla norma nueva possel tla sezion de cuntrol dla Chëurt di Conc a Bulsan unì juntà n cumëmber nuef numinà dal Cunsëi provinziel.
La segonda norma de atuazion reverda n terzo cunselier de Stat che vën dala provinzia de Bulsan. La sezion de Cunsëi de Stat se cruzia de caji de apel sun sentënzes dla sezion dl TAR a Bulsan.
La terza norma de atuazion nueva reverda l recunescimënt dla populazion ladina tl Chemun da Ciastel. Canche l fova unì udù dant la cherta de identité te trëi rujenedes per i zitadins di chemuns ladins ne fovel nia unì tenì cont dla frazions ladines da Ciastel. Cun la norma nueva ti vëniel nce dat la puscibltà ai zitadins da Sureghes (472), Bula (135) y Runcadic (516) de giapé la cherta de identité te trëi rujenedes. Chësta norma nueva reverda nfati passa 1.100 persones.
L’ena che vën iel udù dant de traté na cuarta norma de atuazion che reverda n ejam sun la terminologia giuridica per talian y tudësch ti cuncorsc da giudesc tla provinzia de Bulsan.
usp
