Atualità
Butëighes daviertes da sëira nce te Gherdëina y a Corvara
USP – Sëires cun la butëighes daviertes dajerà nce ntan chësc instà plu vita a 32 luesc dl Südtirol. La scumenciadiva di buteghieres pieta aldò dl assessëur provinziel Widmann atratività y vitalità ai zëntri di luesc. Danter i luesc ladins à Corvara bele scumencià cun la prima sëira, n merdi ai 12 de lugio sarà S.Cristina l prim luech te Gherdëina a tenì la butëighes daviertes nce da sëira.
Corvara ie l sëul luech dla Val Badia che pieta l zënter cun la butëighes daviertes nce da sëira. Nchin ala fin de agost uniral de juebia tenì la butëighes daviertes dala 9 nchin mesa la 11 da sëira.
L’azion dl shopping da sëira scumëncia te Gherdëina n merdi ai 12 de lugio. S.Cristina pieta chëst ann trëi sëires, de lunesc, merdi y juebia da mesa la 9 nchin la 10 da sëira.
N mierculdi ai 13 de lugio scumëncia nce i buteghieres de Urtijëi cun la sëires longes che unirà for pitedes de mierculdi y vënderdi dala 9 nchin mesa la 11 da sëira. Ai 29 de lugio y ai 26 de agost uniral pità n program speziel nchin mesanuet.
Te Sëlva vëniel de merdi y vënderdi pità la butëighes daviertes da sëira, l shopping do vëis vën tlo pità dala 9 nchin mesa la 11 da sëira.
Te duta la valeda vën l azion di buteghieres piteda nchin ala fin de agost.
“L ie mpurtant che l vën dat n majer valor ai zëntri cun azions y programs che à l fin de mantenì la vela de butëighes daujin ala cëses, de ti dé vita ai luesc a na maniera che i se mantën atratives da viver” dij la assessëur Widmann. La butëighes daviertes da sëira ntan l instà ie n model drët garatà de culaburazion danter cumerz, manco muvimënt di auti y l tré ite de plu ciamps economics sciche artejanat, gastronomia y turism. De chësc vieres lëura nce l’aministrazion provinziela per ti dé plu valor al cumerz di luesc.
La sëires cun la butëighes daviertes pieta nce ucajion de se ancunté y de scumenciadives sëuraprò ti luesc. La lista de duc i 32 luesc dl Südtirol che pieta l “shopping da sëira” ie publicheda tl internet sun la plates dla lia di buteghieres www.hds-bz.it y nce sun la plates provinzieles www.provinz.bz.it/wirtschaft
Shopping da sëira
Urtijëi | mierculdi y vënderdi: 21:00 ala 22:30 Uhr |
S. Cristina | lunesc, merdi y juebia: 20:30 ala 22:00 |
Sëlva | merdi y vënderdi: 21:00 ala 22:30 Uhr |
Corvara | juebia: 21:00 ala 22:30 Uhr |
as
