Atualità
13 milion de euro per scoles, proiec nce a Urtijëi y Mantëna Todëscia
USP – Per l finanziamënt de 13 scoles dajerà la Provinzia de Bulsan ti ani 2011-13 ora feter 13 milion de euro a diesc chemuns. 7 milion unirà bele paiei ora chëst ann. Chësc ie unì fat ora dala Cumiscion provinziela per frabiché scoles che ie ai 29 de lugio unì meneda dal presidënt Durnwalder.
Per frabiché, mantenì y ngrandì scoles elementeres, mesanes y scolines à la Provinzia de Bulsan ti ultimi ani dat ora truepa milions de euro. Chësta frabiches ie de cumpetënza di chemuns, se desferenzian dala scoles autes y prufescioneles che vën frabichedes dala Provinzia nstëssa. De ndut vëniel chëst ann fat nvestimënc per 35 milion de euro per scoles y de 10 milion de euro per scolines. La medema somes fovel nce l ann passà. La cumiscion, de chëla che fej nce pert la assoziazion di chemuns, tol la dezijion de tò su proiec tl program y pona n cont dl finanziamënt.
Danter i cin proiec per scoles che ie l’ena passeda unì tëuc su tl program iel nce chël de baraté ora i vieresc dla scola elementera de Urtijëi y l ressanamënt dla scola elementera a Mantëna Todëscia.
as
