Atualità
Jonta per adurvé dl ciaut di mplanc da fé strom
USP – I mplanc de energia alternativa cun chëi che l vën fat strom y ciaut vën fai for de plu nce te nosc raions. La Jonta provinziela se damanda che pra i mplanc de chësta sort (Blockheizkraftwerke/impianti di cogenerazione) che à na produzion de passa 100 kw, muessel unì nuzà amaca 70% dl’energia termica.
I trend de fé mplanc per la produzion de strom y ciaut ie de moda ajache i vën nce sustenì dal Stat. Te gran pert dla Talia vën l ciaut me lascià ora tl’aria. “Tlo da nëus ne dëssel nia unì lascià ora l ciaut tl’atmosfera, ma l dëssa unì nuzà” à dit Durnwalder do la senteda dla Jonta. “Chësc possa unì fat trasfurman l ciaut te strom o l dajan inant sciche mplanc de sciaudamënt a destanza”. Chësta diretiva vel per mplanc che à na produzion de passa 100 kw. Te chisc caji muessel unì nuzà amaca 70% dl ciaut.
as
