Atualità
L’assessur provinzial Laimer inaôda al 1. d’otober l’oasa de palsa Pantan Sarè a Pedraces
USP – En sabeda, al pröm d’otober vëgnel inaudè ofizialmënter la cuarta dles nü oases de palsa Pantan Sarè a Pedraces.
"Cun chësc proiet" alza fora l’assessur provinzial por l’ambiënt Michl Laimer"déssel gnì recordè la vedla tradiziun di bagns tl Südtirol, che à albü süa floridöra tl scomenciamënt dl secul passè y che ê conesciüs sura i confins fora."
La oasa de palsa Pantan Sarè é tl comun de Badia, a 1.363 metri sura le livel dl mer, y é la cuarta dles nü oases de palsa do le Bagn Taufer a Tscherms, Überwasser te Ulten y i Bagns de Rumestluns a La Val. Dan da cater agn s’à portè pro l’idea de fà a na moda da ti rové pormez ales eghes minerales dl Südtirol, ajache tröpes ne gnô nia plü adorades. Dl 2008 àn metü man cun le proiet cun chël che les fontanes vëgn ressanades y i fistis dess invié a ćiarćé.
L’ega de Pantan Sarè gnô bele da vedlamënter incà aprijada sciöche meso cuntra le romatisc, les maraties dla pel y les dificoltês da trà le fle. D’isté dl 2010 é l’ega minerala indô gnüda piada sot y ota cun döes condütes ala oasa de palsa; öna na condüta condüj l’ega te fistì y l’atra te spina, da olache an po spo la bëre. L’ega é pura a livel bateriologich, mo ara à n tof bindebò sterch.
L’Assessur provinzial Michl Laimer inaôda
la oasa de palsa Pantan Sarè a Pedraces
en sabeda, al 1. d’otober, dales 10.30
deboriada cun Astrid Sapelza dl Ofize provinzial Gestiun ressurses d’ega y l’ombolt dl comun de Badia Iaco Frenademetz.
Dla cornisc musicala se crüzia i percuscionisć Jack Alemanno, Emanuel Valentin y Max Castlunger dl Trio J.E.M..
Pian ia dala ćiasa de comun de Badia a Pedraces éson te feter diesc menüć a pé pro la fontana: jon sön la strada prinzipala devers La Ila ojon do ca. 50 metri a man dërta ti jon do ales tofles. Ala oasa de palsa röion da na sëmena sura le Residence Aria d’Bosch.
usp
