Atualità
Senteda costituënta per la grupa euregio: culaburazion mo plu strënta
USP – Tl Ciastel Tirol se à (NCUEI) ai 13 de utober ancuntà i reprejentanc dl Trentin, Bulsan y Tirol per la prima senteda do la fundazion dla grupa europea de culaburazion teritoriela (GECT/EVTZ). I obietives prinzipei dla culaburazion reveda la trassa dl Prëner, l auzé dl daz, l mparé rujenedes, la tueda y la union dla nfrastrutures tl ciamp dl’energia.
Bele da duman à la Jonta dla grupa europea (GECT/EVTZ), metuda adum dai trëi presidënc de provinzia Luis Durnwalder, Günther Platter y Lorenzo Dellai, metù ju l program de atività dla grupa nueva per l ann 2012. Riesc do se à doi reprejentanc de uni Jonta provinziela (per l Südtirol fovel mo l assessëur ladin Florian Mussner) y di cunsëies provinziei, dat ju cun i statuc y la ndicazions dla grupa europea de culaburazion teritoriela. Aldò dl presidënt Durnwalder se an tëut dant de cunlauré te pusciblmënter duc i ciamps ulache la trëi provinzies à velch deberieda y à nce i medemi bujëns. “Muan de chësta basa iel nasciù 80 proiec a chëi che n muessa śën ti dé la prioriteies” à dit l presidënt dla Provinzia.
Bele tla prima senteda a Dorf Tirol iel unì tratà l spusté dl trafich pesoch dala streda ala ferata. Chësc bujën vën sorissà dala ntenzion dla guviern dl’Austria de auzé l daz tla valeda dl Inn dessot. “Son de chëla che l ne porta nia auzé l daz da una na pert. L aumënt porta me la fazion che n uel arjonjer sce l reverda duta la trassa dl Prëner” à dit Durnwalder. La grupa europea à bele delibrà de ntervenì de chësc viers pra i guvierns.
N auter argumënt de gran mpurtanza ie l’energia. Tlo se à la grupa europea tëut dant de nuzé funtanes de energia alternativa sëura i cunfins y de mëter adum duta la scumenciadives sun la trassa dl Prëner tl proiet “Green Corridor”. Mplu se tratela nce de taché adum la nfrastrutures dal strom sun i cunfins dl Reschen, Prëner y a Vierschach.
N ejëmpli de argumënt strategich ie per i presidënc provinziei nce la furmazion y i jëuni. “La generazion jëuna dal didancuei ie la prima che crësc su zënza l pëis dla storia, perchël messons ti giaurì la protes dl crëscer adum” à dit Durnwalder.
L presidënc dl Tirol Platter à tl Ciastel Tirol sorissà che la trëi Provinzies à cun l proiet dl tunel dl Prëner bele demustrà de avëi suzes sce les lëura deberieda. “L’Euregio, nscì Platter, ie la sëula streda tl daunì: la va de cialé inant y nia de reviers.” Chësc pont de ududa à nce l presidënt trentin Dellai che spera che la grupa europea posse mo ti dé plu forza al’autonomia dla trëi provinzies. “Cun la grupa dl’Euregio ons obietives per n tëmp curt y n tëmp lonch: cie che ie da realisé de prëscia metons te proiec cuncrec, cie che ulon arjonjer te n tëmp plu lonch giapa forma te na majera region che crësc adum sëura i cunfins”. Per ti dé nce visibilità a chësta grupa dl’Euregio, ne dëssel nia me unì njenià na prejentazion tres internet, ma nce na logo y n cajo nce na bandiera.
as
