Ambiënt | 17.10.2011 | 15:26

Pià la lores te Ulten - sën cuntroleda tres radio

USP – La lores che ie ti ultimi dis jita ncantëur tla valeda de Ulten, à s’ën n ciol trasmitënt ntëur al col. Ntan la la nuet dl 17 de utober iel unì pià la lores che n à inò messù lascé jì. “L trasmitënt ti ie unì metù acioche savon ulache ie la lores, acioche pudon n cajo ti l fé al savëi ala jënt y acioche pudon, pernan che giapon la lizënza, nce l pië” à spiegà l presidënt Durnwalder do la senteda dla Jonta provinziela.

Bele cins sëires ti ie i esperc dla Provinzia stai do al lores tl raion de St.Walburg te Ulten per pudëi la pië. Ti ultimi dis ovel zarà de plu biesces. L ie na situazion problematica ajache chisc caji ie suzedui sun pastures daujin ai luesc da paur y la lores ie nscì for inò ruveda de reviers a magë.

Chësc an nce nuzà per pië la lores, metan ora laces de corda dlongia na biescia zareda. “N dumënia, ntëur la 21.15 ie la lores pona zapeda ite tla trapula. L ti à fat na ndormia y ti à metù n ciol trasmitënt” à spiegà l presidënt do la senteda dla Jonta.

La lores ie unida usserveda dut l tëmp y canche l se à descedà dala ndormia l an inò lasceda jì. “Velch d’auter ne pudovel nia unì fat ajache l minister a Roma ne à mo nia dat resposta ala dumanda de pudëi mené demez la lores” à spiegà Durnwalder. Tres l trasmitënt y njinies sateliteres possen śën for udëi ulache ie chësta lores. Sce la lores ruva massa daujin ala cëses o sce la ëssa da zaré de plu tieres possen nce ciacé demez la lores. “A chësta maniera possa la lores inò deventé plù spevia” à dit i esperc.

as

Downloads