Atualità
Butëighes stlutes de dumënia: Jonta uel orars avisa
USP – La Jonta provinziela ie de chëla che la butëighes dëssa de dumënia resté stlutes. Da chësta posizion de basa dëssel, a una cun i partner soziei, mo unì fat ezezions.
La manovra finanziera dl Stat talian à nce tl Südtirol giaurì la descuscion da nuef. Bele dan doi mënsc se ova la Jonta provinziela dat ju cun l aumenté di orars de giaurida dla butëighes y ova dit de vester contra na liberalisazion totala sciche udù dant a Roma. I assessëures provinziei ie particularmënter contra la butëighes daviertes de dumënia. Chësta posizion ie (NCUEI) ai 24 de utober unì cunfermeda: la dumënia dëssa resté di de paussa.
Aldò dla particulariteies de uni luech dëssa i chemuns mo avëi la puscibltà de lascé pro vel ezezions. “Particularmënter per luesc turistics saral debujën te tenì vel dumënia la butëighes daviertes y velch nce stlutes. Perchël dëssa i partner soziel abiné na soluzion” à dit l presidënt Durnwalder do la senteda dla Jonta provinziela.
I assessëures provinziei ie de chëla che pra la majera festes dëssa la butëighes resté stlutes. Minà iel tlo dantaldut Nadel y S.Stefun, l Ann nuef, ai prim de mei y da Unissant. Tla regulamentazion dëssel aldò dl presidënt dla Provinzia nce unì respetà i pitli luesc da mont ulache la butëiga de alimenteres ie davierta la dumënia do mëssa.
as
