Atualità
Dimiscions dl presidënt dla SEL: Jonta tol ai 14 na dezijion
USP – I presidënc dl cunsëi de aministrazion y dl cunsëi di revisores dla SEL, Klaus Stocker y Franz Pircher à (NCUEI) ai 7 de nuvëmber metù si ncëira a desposizion dla Jonta provinziela. Te n scrit ie unì fat al savëi ai assessëures provinziei che l diretëur generel Maximilian Rainer à damandà trëi mënsc de aspetativa nia paieda. “N iede ulons valuté la cunseguënzes y n lunesc che vën, ai 14 de nuvëmber ulons tò na dezijion” à detlarà Durnwalder.
Do la nrescides da pert dla magistratura sun la cuestions de produzion de strom y la reazion sun la ncëria de Maximilian Rainer, à l presidënt dla SEL fat al savëi ala Jonta provinziela de mëter si ncëira a desposizion. Tl medemo scrit al fat al savëi al Provinzia, che à la maiuranza dl’azions, che l diretëur Rainer à damandà n aspetativa de trëi mënsc zënza paiamënt. Te n’auta lëtra à nce l presidënt dl cunsëi di revisores dla SEL Franz Pircher comunicà de mëter a desposizion si ncëria.
“La Jonta provinziela à tëut a cunescënza chësta comunicazion y uel śën valuté la cunseguënzes. Tla senteda dl lunesc che vën ulons tò na dezijion sce azeté chësta dimiscions” à dit Durnwalder ai jurnalisć. La dumanda dl diretëur Rainer messerà unì trateda dal Cunsëi de aministrazion dla SEL ajache la se trata de n raport de lëur danter la sozietà y n si dirijënt.
as
