Atualità
Sculeies zipla auti de dlacia per l zënter de Urtijëi
USP – I sculeies dl Lizeum d’ert cun Scola prufesciunela de Urtijëi à ntan l’ena passeda fat scultures de dlacia per n cuncors metù a jì n culaburazion cun la lia turistica y l chemun. L prim pest à venciù l scultura dl auto VW Käfer. Ai sculeies ti iel cun chësta scumenciadiva unì pità na ucajion particulera de nseniamënt, per l zënter de Urtijëi pieta la scultures na bela atrazion artistica.
Te tëmp de n’ena de scola à i sculeies cun si maestri trasfurmà 17 metri cubich de dlacia te cater auti a grandëza naturela. La culaburazion danter l Lizeum d’ert cun Scola prufesciunela, la Lia turistica y l Chemun de Urtijëi à pità ucajion de nseniamënt de scultures te majera dimenscions. “Dala proietazion cun fé l model y pona anjenië ca la dlacia, ie per nosc sculeies veramënter stat n’esperienza particulera de mparé a lauré cun n material nuef” spiega la diretëura Elisabeth Baur.
L prim pest à venciù la scultura dl VW Käfer, dan al Fiat 500 y l Mercedes Silberpfeil cun la Bugatti che ie unic valutei tramedoi al terzo post. La scultures, che mesura nchin a 4,5 metri de lunghëza, ie na gran atrazion per l publich. “Te chëla che sënta ite truep mëndri per fé fotos vën a se l dé na relazion danter scultura y l publich” spiega l nseniant Filip Piccolruaz. Dlongia la sudesfazion de avëi venciù l cuncors, à i cater sculeies Davide Holzknecht (che à fat l model), Loredana, Roberto Debertol y Matthias Sanol pudù pië do n bon da 500 euro.
La scultures di cater auti de dlacia ti dà dantaprima da sëira n flair particuler al raion da jì a pe de Urtijëi: te duta la scultures iel unì metù ite na lum che luminea la scultures da dedite ora.
Cuncors de scultures de dlacia
1. VW Käfer de Davide Holzknecht, Gianluca Miola, Yuri Bettega, Mirko Überbacher, Helene Fromonteil
2. FIAT 500 de Simon Comploi, Luca Mussner, Gioele Bortolotti, Seppl Mussner, Giampaolo Callegari
3. Mercedes Silberpfeil de Dennis Kollmann, Alessandro Holler, Loredana Tauferer, Antonin Martineau
3. Bugatti de Giovanni Moscon, Liuba Petrov, Roberto Debertolis, Patricia Salcher, Matthias Sanoll
as
