Atualità
Minister Gnudi ie la persona de referimënt per l Südtirol n cont dla reformes de Monti
USP - L’ena passeda ova l presidënt di ministri Monti fat ora cun l presidënt dla provinzia Durnwalder che l ëssa nciarià na persona de referimënt per la tratatives cun l Südtirol. S’ën iel unì fat al savëi che l se trata dl minister ala regions Piero Gnudi che traterà cun i reprejentanc politics dl Südtirol per l’atuazion dla reformes te nosta provinzia.
Un di ponc zentrei dl’ancunteda de Durnwalder y l presidënt di ministri Monti, n juebia dl’ena passeda, ie stat de giapé na persona de referimënt tl Guviern talian. Monti ova mpermetù de ulëi prësc numiné na tel persona y à śën tenì parola numinan l minister Gnudi cuordinadëur dla tratatives da pert dl Stat. Gnudi ne ie nia me minister ala regions, ma nce per l sport y l turism.
“Me fej plajëi che l presidënt di ministri à tenì parola y à tan riesc numinà na persona de referimënt” dij Durnwalder che spera sun tratatives ogetives y costrutives. “Da nosta pert sons anjeniei per na bona culaburazion cun Roma” dij l presidënt dla provinzia de Bulsan.
as
