Atualità
Candidac ladins passa plu saurì l’ejam de rujeneda
USP – La statistica di ejams de bi- y trilinguism, data ora dal ASTAT, mostra su che i candidac ladins passa plu saurì i ejams permez ala cumpëida generela. Tl ann 2011 ie n generel passei 46,5 % di candidac - di candidac ladins iel passà l 77,5%.
La statistica dl Istitut de statistica ASTAT testemunieia che i candidac ladins passà plu saurì l ejam de bi- y triliniguism te duc i cater livei. De duc i candidac che l ann passà à fat i ejams iel passei 46,5%. Sce n tlopa ora i candidac dla valedes ladines, nen iel stat 77,5% che ie passei i ejams. “La gran defrënza dl suzes di candidac ladins permez ala cumpëida generela ie n sëni de suzes dla preparazion de rujenedes te nosta scola paritetica ladina” sorissea l assessëur Florian Mussner. Per i ladins se tratel te chisc ejams nce de cumpetënza tla segonda rujeneda: “chësc ne possen nia pertënder me nscì, perchël me fejel mo plu plajëi” à dit l assessëur ladin.
I candidac ladins luna nce ora n cont di ejams scric. De ndut iel te chësta pert di ejams passei l 37,4% - di candidac ladins ie passei l 60,7%. Na gran defrënza iel nce per chëi che à abù suzes tla pert a usc, tlo iel n generel passei l 72,5% y 92,4% di candidac ladins.
La defrënza danter candidac ladins y la cumpëida generela se mostra te duc i cater livei de ejam. Pra l ejam de livel “A” à 61,4% abù suzes. Davia che l ejam a usc à nce fat candidac scric ite l ann dant, ie l suzes di ladins nchinamei sëura l 100%, plu avisa dl 106,6%. Pra l ejam de livel “B” che vën calculà per na furmazion cun matura, ie tl 2011 me passei l 30,8%. Passa l dopl ie stai i candidac ladins che à abù suzes, avisa l 62,6%. Feter i medemi valores statistics iel unì arjont per i ejams de livel “C” cun 39,1% de suzes n generel y 61,4% per i ladins. Ti ejams de livel “D”, ulache l vën me fat la prova a usc, ie passei 74,8%. I candidac ladins ie duc passei arjunjan n suzes dl 100%.
Paredlan i valores cun la mesaria di ultim 5 ani, ie l suzes generel aumentà de 3%. La perzentuela di ladins che ie tl 2011 passei i ejams ie de doi percënt plu auta permez al trend di ultim cin ani.
Resultac di ejams de bi- y triluguism 2011
| candidac passei | candidac ladins passei |
cariera ‘A’ | 61,4% | 106,6% |
cariera ‘B’ | 30,8% | 62,6% |
cariera ‘C’ | 39,1% | 61,4% |
cariera ‘D’ | 74,8% | 100% |
dut adum | 46,5% | 77,5% |
as
