Atualità
L vën laurà ora diretives per la chëuta IMU
USP – La Jonta provinziela de Bulsan se à (NCUEI) ai 19 de mei dat ju plu a puntin cun la diretives per i chemuns n cont dla nueva chëuta unitera di chemuns IMU. De plu agevolazions ie bele ududes dant, ma dan na dezijion definitiva se à i assessëures damandà mo vel calculazion plu avisa.
Nchin ala fin de mei ulëssa la Jonta provinziela purté inant n cheder de lege che debe urientamënt ai chemuns sun co mpusté la chëuta IMU. Chësc ie debujën davia per juni iel a Roma bele unì udù dant l paiamënt dla prima rata.
L Guviern talian à udù dant che mesa la chëuta minima muessa unì data inant al Stat. Per l Südtirol fajessel ora belau 60 milion de euro da paië a Roma. Nfati ie chësta chëuta nueva unida purteda inant per judé a ressané la finanzes stateles.
Cun la cuotes ududes dant dal Guviern unissel tl Südtirol a se l dé 37-38 milion de plu. “Ulessan mëter a jì reduzions a na maniera che i chemuns ruve nce cun la chëuta nueva sun feter la medema ntredes sciche nchinamò cun l’ICI” à dit Durnwalder.
“Te nosc cajo de autonomia ie la Provinzia respunsabla dl finanziamënt di chemuns y nsci nce dl paiamënt de vieres de Roma” à spiegà l presidënt dla Provinzia do la senteda dla Jonta. Sce la cuota de chëuta unissa tlo da nëus smëndrida a manco dl minim udù dant dal Guviern, messëssa i chemuns nstësc paië la defrënza per ruvé ai 60 milion de euro.
Aldò dl presidënt Durnwalder ne ulëssen nia jì sota la cuotes minimes ududes dant dal Guviern. Per l cuatier ulache n viv nstësc vëniel pensà de lascé do i prim 200 euro plu 50 euro per uni mut/muta. Sce n cuatier vën nuzà dai mutons, genitori o fredesc ulëssen dé la ndicazion de la cuota minima de 4 permile (mpede i 7,6% udui dant dal Guviern). L medemo iel per ntant nce udù dant sce l cuatier vën fità a residënc che l adrova da viver nstësc. Cuatieres uec ne dëssa aldò de Drunwalder nia giapé agevolazions. “Lascé do la chëuta per cuatieres uec ne fossa deguna sburdla acioche i vënie abitei o ressanei. Tl cajo de cëses sota defendura di bëns monumentei ulëssen te Jonta provinziela udëi dant agevolazions. Nsci nce per frabicac per prudoc da paur y bestiam. Cooperatives dëssa paie na cuota arbasseda al 2 per mile.
Dan ruvé a na dezijion definitiva sun la pruposta de lege che debe ndicazions ai chemuns uel la Jonta mo stlarì vel aspec cun i chemuns y avëi vel cont plu avisa dla ntredes che unissa a se l dé.
as
