Desvalì | 23.04.2012 | 14:47

Jonta provinziela: Ancunteda di Alpini, IMU, SMG y nsenianc

USP – Te si senteda da (NCUEI) ai 23 de auril à la Jonta provinziela dat pro na lingia de delibres. Tla cunferënza stampa do la senteda, à l presidënt cunedì de plu argumënc de majer nteres, danter chisc nce la promozion n ucajion dl’Ancunteda di Alpini y i pruvedimënc de segurëza, l IMU per strutures publiches y la trasfurmazion dl SMG.

Ancunteda di Alpini
Pra l’ancunteda di Alpini, dai 11 ai 13 de mei a Bulsan dëssa unì adalerch 300.000 persones. La Jonta provinziela vëj n’ucajion de promozion dl Südtirol y de si prudoc. Per cuncretisé chësta idea tulerà i assessëures Widmann y Berger su cuntat cun l Chemun de Bulsan per valuté la pusciblteies de promozion. La cumiscion tecnica de prutezion zevila à prejentà na relazion sun i pruvedimënc che n à metù a jì per seguré lueges dai auti, l trasport, ma nce l cumpaniamënt y la segurëza. Da pert dla Jonta vëniel mo pesimà sun la segurëza publica, nce sce chësta ne ie nia de si cumpetënza. Durnwalder à fat n apel ai alpini de tenì sun si ambizion de nia vester politics, ma de mustré cumprenscion per la cultures. Sce l’ancunteda di Alpini unissa meladurveda per estremismes politics, fossa chësc de dann per l Südtirol.

IMU per strutures publiches
La Jonta provinziela à stlarì i caji per chëi che la Provinzia paierà la chëuta IMU. Per la strutures provinzieles saral sciche pra la ICI: per strutures nuzedes per fins istituzionei sciche spediei, scoles o ufizies ne uniral nia paià la chëuta. Sun d’autri frabicac de puscion sciche la casermes mo nia nuzedes o la bar dla Provinzia uniral alincontra paià la chëuta IMU. L cajo di cuatieres soziei dl IPES muessa mo unì studià plu avisa. Tlo renunzieia nce l Stato sun na pert dla chëuta. “Per l ICI à la Provinzia paià da 5 a 600.000 euro, per l IMU fajons cont cun mo n tant, da 1 a 1,2 milion de euro” à dit Durnwalder.

SMG resta nchin ala fin dl ann
Do che la Jonta provinziela ova bele dat pro la trasfurmazion dl SMG a n’agenzia provinziela, se tratela śën co dé inant l personal y la cumpetënza de atività. Nsci iel unì fat ora che l SMG dëssa mo lauré inant nchin ala fin dl ann y te chësc tëmp anjenië dut a puntin acioche l’agenzia posse scumencé si atività cun l prim de jené 2013. L cuntribut provinziel da chëst ann de 12,35 milion de euro unirà per chësta rejon mo dat ala sozietà SMG.

Nseniamënt tl’ena curta
Nce sce l proscimo ann de scola scumencerà n’ena dant messerà i nsenianc de ndut fé unfat ëures de lëur. La Jonta provinziela ne uel nia fé mudazions permez a chësc ann de scola. N cont dla partizions per l ann 2013/14 iel unì nciarià n’agenzia de  purté inant tratatives cun i sindacac de scola.

as