Atualità
Proiet-Interreg "Sagns deboriada": relevamënt dl bojëgn te cin comuns
USP – Le sostëgn dla cualité dla vita y dla sanité te comuns dl Südtirol y di Grijuns: chësc é le fin dl proiet Intereg IV sagns deboriada„insieme sano-gemeinsam gesund” che à metü man dan da oramai n ann. Cin comuns dl Südtirol Türesc, Badia, Vahrn, St. Martin in Passeier y Truden sciöche inće cin comuns di Grijuns sostignarà y metarà a jì scomenciadies de partezipaziun ativa da pert dla popolaziun.
Le fin dl proiet sagns deboriada "insieme sano-gemeinsam gesund” é chël de miorè la sanité y la cualité dla vita tl comun. Sciöche pröm vare vëgnel relevè le bojëgn a plü livì y al vëgn stabilì ćiamps d’aziun poscibli te vigni comun. Le secundo vare é spo chël de conzepì y realisé aziuns y provedimënć dedicà al sostëgn dla sanité y che dess portè pro a miorè la cualité dla vita.
Le relevamënt dl bojëgn é śëgn gnü invié ia ti cin comuns dl Südtirol che tol pert al proiet; chisc dis ti àra tochè al comun de Badia. Jones y jogn dla secunda y terza tlassa dla scora mesana é gnüs invià a fà na reflesciun sön le dagnì te so comun. Denanco mëte man le laboratore cun i jogn y les jones él stè impröma da analisé la situaziun. L’ombolt de Badia Iaco Frenademetz à alzè fora che al s’inconforta da ciafè idees y impulsc nüs por so comun che gnarà a s’al dè tratan chësc proiet. Al vëiga dantadöt de bun edl che al vëgn trat ite la popolaziun tratan döt le decurs dl proiet deache al é zënzater les zitadines y i zitadins che sa avisa ći che al va debojëgn por vire bun tl comun de Badia. Düć i resultać gnarà presentà ala fin de mà en gaujiun de na incuntada dla popolaziun, olache al gnarà inće invié düć canć a tó pert ai grups de laûr. L’assessuria por le sozial Edith Dapoz, responsabla dl proiet tl comun de Badia, é sigüda che les zitadines y i zitadins é a öna da tó pert ativamënter al proiet deache ara nen va pö dl dagnì de so comun y cun chësc inće de süa cualité dla vita.
Tl Südtirol él la repartiziun provinziala „Familia y politiches soziales“ a će dl proiet Intereg IV. “Tl Südtirol” ti spliga Karl Tragust ales porsones che s’un tol sura dl proiet pro so scomenciamënt „orunse ciafè fora, tres na valutaziun dl bojëgn ti singui paîsc, cai che é i grups a chi che al vëgn dantadöt fat referimënt y aladô de chësc dess spo i proieć portè a resultać desfarënć te vigni comun”. La Fondaziun Vital sciöche zënter de competënza por la promoziun dla sanité é gnüda inćiariada da mëte a jì la majera pert dl proiet y da coordiné le proiet sura i confins fora. Martina Vieider dla Fondaziun Vital che é responsabla dl proiet Comun sann sotrissëia che le proiet depënn dala colaboraziun dla popolaziun y che al é porchël d’importanza da informè les zitadines y i zitadins sön i argomënć desvalis a na manira da descedè te ëi la vëia da tó pert ativamënter a süa realisaziun.
usp
