Atualità
Scores dla provinzia de Balsan a Bruxelles
USP – Bruxelles che é n punt zentral dla politica europeica, vëgn chirì fora da tröpes tlasses de scores de paîsc desvalis. Inće i scolars dla provinzia de Balsan va tres indô tla "capitala dl’Europa". Les tlasses vëgn sostignides dala sënta destacada dla Provinzia a Bruxelles.
Dantadöt d’aurì é tröpes tlasses jüdes a Bruxelles. Les ultimes döes edemes d’aurì él jü tlasses de cater scores a Bruxelles. Ara se trata dantadöt de istituć tecnics economics, che n’orô nia ma conësce Bruxelles, mo odëi da daimprò les istituziuns europeiches. Ara se trata dles tlasses dl istitut tecnich economich de Balsan y Bornech, sciöche inće dl istitut tecnich economich talian "Cesare Battisti" de Balsan y dl istitut tecnich economich ladin da La Ila.
Les jones y i jogn à albü tröp da fà tratan i trëi dis a Bruxelles. Al ti é gnü fat n’introduziun sön le monn dles istituziuns dl’UE, ai à odü ći che al sozed tl Parlamënt europeich, ai é jüs a ti ćiarè ala sënta dla Comisciun europeica, sciöche inće a chëra dl Consëi dl’UE y dl Comitê dles Regiuns. Ai à inće odü la sënta destacada dla Provinzia de Balsan a Bruxelles tla Rue de Pascal. Implü ési jüs a ti ćiarè ala cité vedla de Bruxelles, a Gent y Brügge.
Les scores é gnüdes sostignides pro l’organisaziun de so iade a Bruxelles dala Repartiziun provinziala Europa, che se crüzia dal 2011 incà di iadi di scolars tla “capitala dl’Europa” tres la sënta destacada dla Provinzia a Bruxelles.
usp
