Atualità
Dat pro l program dl ann per i jëuni ladins
USP – La Jonta provinziela à (INIER) ai 07 de mei dat pro l program per sustenì l lëur per y cun i jëuni tla valedes ladines ntan l ann 2012. L program pieta la basa per sustenì la lies y assoziazions di jëuni a livel finanziel y de cunsulënza.
L program dl lëur per y cun i jëuni pieta n cheder te chël che l Ufize provinziel per i jëuni possa se muever. L program spezifich per la grupa de rujeneda ladina ie unì dat pro dala Jonta provinziela sun pruposta dl assessëur Florian Mussner. Chësc program de set capituli, vëija dant la pusciblteies de sustëni per l’ativiteies, proiec y strutures. Chësc sustëni ne ie nia me a livel finanziel ma nce a livel de cunsulënza. “Lauron do n prinzip de sussidiarietà. Nosc mpëni ie de judé a pité la cundizions acioche la lies y assoziazions di jëuni posse realisé i proiec che les se à tëut dant” spiega Wilma Runggaldier, respunsabla dla pert ladina tl Ufize provinziel di jëuni.
L mpëni dl guviern talian de ressané la finanzes stateles sforza la Provinzia a sparanië nce tl lëur per i jëuni: “l tai de 5% ie te chësc cajo me unì fat sun i nvestimënc y per l’ativiteies di jëuni ons pudù mantenì la medema somes dal ann passà” spiega l assessëur ladin Mussner.
I capituli prinzipei dl program anuel per sustenì l lëur per y cun i jëuni tl 2012 reverda l miuré la strutures per l lëur cun jëuni, la promozion de ativiteies y programs, la furmazion de chëi che lëura per i jëuni, l ntervënt de personal pedagogich, la tueda scientifica, cuntribuc de sustëni y l program de atività dl Ufize provinziel di jëuni.
as
