Atualità
Lista dla prioriteies per l ressanamënt dla uties da mont
USP – Per i osć che mëina la uties da mont che la Provinzia ova sëurantëut dal CAI iel mpurtant savëi canche l possa unì fat lëures de ressanamënt. Na lista dla prioriteies che unirà laureda ora dal departimënt dl assessëur Florian Mussner dajerà respostes. La Jonta provinziela à (NCUEI) ai 26 de nuvëmber nce fat ora che i osć possa nstës fé pertes dl ressanamënt che unirà pona tenì cont tl fit.
![](/news/img/lazy.gif)
Nce sce la Provinzia ie bele dai ani patrona de 25 uties da mont che fova dant dl CAI, ne iel nchinamò nia stat mesun ruvé a una cun la lies da mont n cont de mené chësta uties tl daunì. "Per chësta rejon ons bele doi iedesc slungià i cuntrac d'afit de n ann, y śën ons chësc fat per l terzo iede" à dit l presidënt Luis Durnwalder do la senteda dla Jonta provinziela.
Acioche i osć se feje plù saurì, à la Jonta provinziela fat ora che l dëssa unì fat na lista dla prioriteies di lëures de ressanamënt. "Amanca trëi uties muessa unì fates su da nuef, pert dl'autres ie dassënn danejedes" à spiegà l presidënt dla Provinzia. Dla lista dla prioriteies se à sëurantëut l assessëur Florian Mussner che à la cumpetënza sun l avëi y sun i lëures publics.
Per ruvé plu riesc a n ressanamënt à i assessëures provinziei giaurì la porta dla culaburazion cun privac. "I osć che uel nstësc fé vel lëur de ressanamënt, possa nes prejenté i proiec y i preventives, nëus i cialeron tres y lasceron pona fé i lëures" à spiegà Durnwalder. L custimënt muessa n iede unì curì dal ost, ma pona vëniel deberieda cun i fic, trat ju dal fit dla utia. "Sce l vën fat lëures de ressanamënt pudons a chësta maniera lascé la uties per n struf nce zënza raté l fit" à spiegà l presidënt dla Provinzia.
as
Landeshauptmann Durnwalder über die nächsten Schritte in Sachen Schutzhütten
- Scarica il file audio 974 kb