Atualità
Azetà la mesana de Sëlva y l ngrandimënt dla sarenera
USP – La Cumiscion tecnica dla Provinzia à azetà l proiet per na scola mesana nueva te Sëlva y l ngrandimënt cun renuvamënt dla sarenera a Puntives. Cun chësc dé pro di proiec de mascima, possel unì laurà inant per fé i proiec esecutives.
L Chemun de Sëlva uel fé su da nuef la scola mesana sun Plan da Tieja. Sun na spersa de 725 metri cuadrac dëssel unì frabicà 10.000 metri cubich sëura tiera y 4.700 sot a tiera. Sëuraprò ala scola y ala tlasses spezieles per fé mujiga dëssa tlo nce giapé lerch na sënta de aministrazion per la scoles de Gherdëina. La Cumiscion tecnica dla Provinzia à n lunesc ai 3 de dezëmber dat pro l proiet de mascima recunescian l custimënt de feter 9,6 milion de euro sciche giustificà. Chësta dezijion dla Cumiscion tecnica ie la basa per n finanziamënt dla frabica da pert dla Provinzia y nsci nce per jì inant cun la proietazion esecutiva.
Tla medema senteda à la Cumiscion tecnica nce dat pro che l possa unì ngrandì y fat da nuef la sarenera a Puntives. Aldò dla proietazion prejenteda dala ECO Center AG dëssa i lëures unì a custé 4,9 milion de euro. L mplant che fova unì fat su dl 1992 ie unì njenià per 42.000 persones y purifichea uni ann passa 4,4 milion de metri cubich d'ega. Cun l ngrandimënt dëssa chësta capazità unì auzeda a 97.000 persones.
as
