Atualità
La storia dl’Autonomia te n mosaich de film
USP – 40 ani dal Statut d’Autonomia nuef y 20 ani do la fin dl stritoz per l Südtirol ie l 2012 stat l ann di anuei dl’Autonomia. La Jonta provinziela à metù a jì na sëira tematica, metù tla rë la plata web www.provinzia.bz.it/729212 y à dat ora n cudejel de nfurmazion per turisć. Per la fin dl ann iel śën unit ora l film de mes’ ëura "stimmen voci ujes" che conta dla storia dl Südtirol y dl’Autonomia se nuzan de filmac amatoriei y testemunianzes atueles.
“Autonomia uel di sté sun si giames”, “Autonomia ie la puscibltà de se realisé”, “Autonomia ne ie nia saurì”, “Autonomia uel di pudëi crì ora la scola”, “Autonomia à truep da n fé cun l Südtirol”: chësta y mo truepa d’autra testemunianzes à i doi prufesciunisć dl film Federico Campana y Alessandro Bandinelli, sun ncëria dl Servisc de comunicazion dla Provinzia, metù adum cun films storics. L film mostra su co che dala soma de truepa stories de vita ie l Südtirol deventà chël che l ie.
Bandinelli y Campana ie 40 ani do l Segondo statut d’Autonomia y 20 ani do la fin dl stritoz per l Südtirol jic a crì l’Autonomia dl Südtirol. I à cris do na gran storia, ma abinà ai trueps de pitles: 1500 rodli de film cun 450 ëures de material video che fova unì abinei adum tl proiet “Bewegtes Leben – Vita n muvimënt”. Cun na dëssëina de ntervistes ai metù adum n mosaich de film y de ujes che mostra su co che l Südtirol ie deventà chël che l ie.
L film de 30 menuc ie da giapé debant pra l Servisc de comunicazion dla Jonta provinziela (usp@provinzia.bz.it; 0471 412210; plaza Silvius-Magnago 1, Bulsan).
Na cërcia de "stimmen voci ujes" giaten sun l canal Youtube "Provinzia de Bulsan"
as
